Dat kannst mi glööven!
Toleranz

vun Heiner Zumdohme

To'n Anhören hier klicken:

Lesen deit Heiner Zumdohme.

Inne Bibel, in dat Bauck Levitikus, kaönt wi läsen, dat Mose ein kriedewitten Isareliten wän is. Hei verleiwt sick in ein Wicht, dat ut Äthiopien kummp. Hei hieraotet sei. Wor hei sei draopen häff, dat weit ick nich. Villichte is sei all mit dei Israeliten gaohn, as sei domaols ut Ägypten uttraocken sünd. Wor uck immer. Mose sien Brauer Aaron un siene Süster Mirjam was dat ampart nich recht, dat hei mit ein pikschwattet Wicht an freien wör. Ein Schandaol. Sei wullen üm dorümme sogor as den Üpsten van dei Isareliten affsetten.

Un jüs dor kummp Gott in't Spill. Gott lätt kienen Twiewel upkaomen. Hei is mit dat Freien van Mose heller inverstaohn. Un weil Mirjam un Aaron so dweerig wörn, werd dei beiden bestraoft. Sei schulln erstmaol heller Piene kriegen.

So as van Daoge, häbbt dei Lüe dat uck al domaols heller schwor hatt, mit Lüe ümmetaugaohn, dei anners wörn as sei sülwens, weil sei anners utkeeken, 'ne annere Näsen oder 'ne annere Huutfarwe harn. Ick stell mi vör, ein van miene Bräuers wör domaols mit ein pickschwatt Wicht naoh Huus hen kaomen. Dor harn wi wisse tauerste heller Spektaokel taugange hatt. Gott aower mök fortsen klor, dat hei sowat nich dörgaohn lätt. Aaron un Mirjam häbbt dat ünner Piene lernen mösst.

An masse annere Stäen inne Bibel sünd wi läsen, dat dei Israeliten anhollen werd, frömde Lüe as ehresglieken tau behanneln. So schull man dei Wiendruwen in einen Wienbarg seläwe nich ganz affrieten. Dor schullen aaltied noch ein paor för Utlänner hangen blieven, dei villichte jüs dörtrecken daut, dormit sei in dei Middagshitte immer noch ein paor Druwen find. Wödden wi van Daoge woll jüs so frei wat affgäwen?

Lessdens häbb ick läsen, dat dat lange Tied in Afrikao kiene Klöster geef, wor schwatte un witte Mönche tauhope läwen dön. Dei Europäer harn ehr eigen Kloster un dei Afrikaoner uck. Eierst vör gaut 30 Johr füll dei Mönche up, dat dat gägen den Geist vanne Bibel staohn dö, vör Gott sünd alle Menschken gliek.

Dorvan bün ick faste öwertügt: Gott häff aale Menschken gliekeväl leiw, off nu kriedewitt oder schwatt. Jeder is ein Geschöpf van Gott. Dat uck so tau seihn, löset nich forts aale Probleme in 't Tauhopeläwen van Schwatt un Witt. Aower so fang wi dormit an.

Bi us up plattpartu.de finnt man nu utsöchte Bidräge van disse Radiosendung.