Dat kannst mi glööven!
Nich glieks taugäwen — dörhollen!

vun Pfarrer Heiner Zumdohme, Damme


To'n Anhören hier klicken:


Lesen deit Heiner Zumdohme in Südollenborger Platt.


Lessdens köm eene junge Deern tau mi in't Pfarrhuus. Se wull ute Karken uträrn! Se dö sik heller argen öwer Rom, denn Paopst un de Bischköpe. — Wat schull ik ähr nu seggen?

Daor trärt ja masse Lüe ut. Un aale hebbt se ähre Grünnen! Väle trärt ut, weil se daorvan öwertügt sünd, se glöwt nich an Gott. Wär annere meent, se käönt uk oahne Karken an Gott glöwen. Un dann giff dat uk wecke, de träert ut van wegen de Karkenstüürn, de willt off mäöt spaorn.

Kien een van disse Lüe will ik dat nu uträden. Man anners: Wör dat würklich lichter un eenfacher, wenn et de christlichen Karkens nich mehr gäwen dö?

Stellt wi us dat maol vör: Kien Paopst, kiene Bischköpe, kiene Pastöre, kien eene, de nich uk maol af un tau een düüdelk Woort loslät gägen de Werbung, gägen de Spaoß- un Leistungsgesellschkupp un doar dat Wort Jesu van de Leiwde tau de Nächsten gägen setten dait. Kien eene, de nich uk noch maol dänn Maut heff, aopen uttauspreken, dat de Menschk dörnanner kummp un allen Holt verlüss, wenn he sik bloß noch üm sik sülwens draiht. Un kien eene wüdde us daoran erinnern, dat Gott us maokt heff, naoh sien eegen Bild, un dat jedet Läwen daorüme sien eegen Weert heff un heilig is. Güng us dat dann würklich bäter?

Ik hebbe de Deern sächt, dat ik ähren Arger gaud verstoahn kunnde. Aower wenn de Arger öwer de Lüe inne Karken en Grund wör uttauträrn, dann har ik sülwens all lange aals henschmieten mösst. Uk mi passt daor faoken wat nich.

Aower mien Glowe hang nich van de Lüe un ähre Fählers af. Daorför is mi mien Glowe väl tau kostbaor. För kien Geld inne Welt wull ik de Gesellschkupp van miene Bräuers un Süsters missen, de mit mi tauhope — Dach in, Dach ut — bäärt un mit mi de Misse fiert.

Un ik frai mi heller daoröwer, dat dat uk immer noch wär wekke giff, de dat jüs so seht as ik, so as en junge Mauder, de lässdens tau mi köm un wär inne Karken inträrn wull. Väle Jaohre wör ähr dat jüs gliek, wat de Karken mök, aower nu, as se verhieraot wör un lüttke Kinner har, wull se ähre Familie uk eene geistige Heimat gäwen. Annere kaomt, weil se neeschierig sünd up Jesus, wär annere, weil se en Teiken setten willt gägen eene Welt, de bloß noch ähr Glück in Konsum un Unnerhaolen söch.

De junge Deern, de to mi in 't Pfarrhuus kaomen is, is dann doch nich uträern.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


16.10.2016


na baven