Wat daut wi bloots — wat maakt wi nu?

vun Pastor Hans-Eberhard Schulz


Wi harrn den Volkstruurdag, denn den Ewigkeitssünndag, nu na de Karken-Tietreken mit den Advent dat niee Karkenjohr.

An'n Volkstruurdag gedachten wi de Fållnen vun de letzten Weltkriege un sluten dorbi alle Kriegsopper vun uns Tiet mit in. An'n Ewigkeitssünndag gedachten wi de Storvenen vun't letzt Johr un de Wirklichkeit, dat wi all maal starven warden. Veel Besinnen! Krieg as Politik in de Folg vun dat Fortsetten vun de scheiterte Diplomatie, bloots mit anner Middel. Elkeen Doot vun en Fründ orr Verwandten wiest uns en utlatene Schangs.


Bild Rudi Witzke

Dor weer dat vun de Traditioon al anseggt, to Beginn vun dat "Niee Johr" to Buuß to kamen. In Verwachten dorup, dat na de jümmer noch körter warden Dagen dat Licht to uns trüüchkümmt, schullen wi miehr an uns Mitminschen denken. De eigen, in de Familje, un de Frömden, de liekso sik na en erfülltes Leven lengen. In de "olen Tieden" wöör backt, neigt, warkelt. Dorför weer de Adventstiet dor, denn up de Feller geev dat nix to bestellen. Nu kunn'n uns Vörfohrn sik üm de Nöödigkeiten vun ehr Familje kümmern un üm all de, de to Huus un Hoff hörten.

Un wi loopt vun Wiehnachtsmarkt to Wiehnachtsmarkt. Geschäfte lockt mit Sünnerangebotte. Wi kaamt tosamen to Adventsfiern orrer to en kommodigen Bummel över de Märkte. De anseggt Stille Tiet ward to dat Beleevnis vun't Johr: Glövende ielt vun een Besinnen na't anner. Geschäftslüüd rekent mit Verkoop, de dat Johresinkamen endlich in de Gewinnzoon bringen schall.

Liekso, as sik de "Stille Tiet" in Trubel un Besinnenslosigkeit wannelt hett, verkiehrt sik uns Sorg üm de Endlichkeit vun fossile Energie un Roohstuffen un üm den Wannel vun dat Klima in en Duuntje vun Lichten un billigen Schnickschnack.


Wöddel

Mi stöört besünners de Wiehnachtsmänner an de Huuswännen un an den Schostein up de Däcker. So keem ik up de Idee, en "demonstrieren" Engel to buen. De Utgangspunkt weer de Stubben vun en japaansch Kirsch, de in mienen Achterhoff to groot worrn weer un mit ehr Loof elkeen Harvst de Dackrönn füllte. Dissen Engel heff ik in de Adventstiet vör mien Huus stahn. Bloots in de Tiet vun dat "Wiehnachtsdörp" (2011, 2012, 2013) stellte ik ehm över de Wekenenn' ok bi de Kark up.


De Protest-Engel

Mien Grüveln över Religioon, Gloven, Theologie un Moderne bröchte mi up de Utsaag vun mienen "Baden-Engel".

De Religioon
is de Wöddelstock vun uns Mienschsien,
de Minsch glöövt un hööpt —
Religioon
gifft uns Minschen Licht un Warmnis un Kunn, wo wi sünd.
De Theologie
gifft de Religioon en Gesicht,
De Ünnerbuu
is praktische Politik.
Kark un Staat wiest
tiet- un ortsbedingt de Religion.

To mienen Engel leggte ik lütte Handzeddel to'n Mitnehmen mit dat Bild un en upklären Text. Woans hei ankümmt, wat de Lüüd över denken daut, heff ik bit nu noch nich mitkregen.

"Gott is Minsch worrn" — as Märkenprinz in en Stall born, as Juud an't Krüüz hasst un höhnt un elennig to Doot kamen.

Wieldat mi de Grundgedanke "Gott is Minsch worrn" nich looslett, versöök ik siet 1996 en Anter up dat Thema jümmer wedder to kriegen.

So keem ik ok up de Engelsbott von 2013:

Neger kann Gott di nich kamen,
as dat hei in di is:
raatloos
hülploos
utbenahmen in de Leev.

Paradox is: Theologie relativeert de religiöse "Wohrheit". Theologie schafft ut de Bedingen vun en besünner Tiet un en besünner Gegend Schuuvladen för religiöös Erfåhren un Traditschonen.

Weltliche demokraatsch Staaten hebbt de Kalamität so regelt: Se garanteert ehr Börger Religionsfrieheit. So warden unantastbar Staatsreligionen uplööst. Nu kannst glöven, wat du willst. Dor blifft dat nich ut, dat intellektuell un filosofisch in Fraag stellt ward, wat dat Gott, in welk Form ok jümmer, gifft. Wieldat de Minsch aver religiöös is, wöör un ward vun Staats wegen en ideoloogsch Ersatt inföhrt orrer de materiell Tietgeist kriggt de Gesellschopen to faten: Konsum, Pop-Könige, Urlaub, Frietiet, eigen Hüsung.


Mien Hus mit den Engel dorvör

Bi all Verweltlichung un Religionsfrieheit: De Minsch ward in sien Fäuhlen jümmer wedder in den Bann vun Religionen tågen: Se besöökt in'n Urlaub Karken un Tempel, fiert mit bi Volksfeste na Bruuk vun de Regioon. Den schieren Geist, de afstrakte Rationalität kann bloots en PC uthollen.

Dor blifft denn nu aver de Nieschier. Dor hebbt de Minschen in de Astronomie ehr Warktüüg funnen. De Mathematik deit ehr Deil. Mit Copernikus weer dat schafft: De Ierd dreiht sik üm de Sünn, de Ierd is een Kugel. Mit Galilei un Columbus wöör ut de Nieschier Ümdoon un systemaatsch Forschen. De Minsch leggte de Opperrull af. Immer miehr begreep hei de Geheimnisse vun dat Leven. Hei wöör to'n Herrn vun de Welt un över anner Minschen.


Düsse Engel hett wirklich den Kanaal vull

Fromme Glövende rönnten dorför in ehren Gloven gegen de Wänn üm se rüm. Se keken nich ut de Finster. Mit Beden wulln se Weder un Süükdoom as ok sülven anricht Katastrofen afwennen. Se gaht keen Schridd dörch de Döör na buten. Twors nütt se Technik un Medizin, aver se glöövt nich, dat se in'n Gehorsaam gegen de Natuur Gott sien schöpperisch Kinner sünd, dat se dat daut, wat ehr Öllervadders vun Gott vergeevs erbeden hebbt. Se seihn nich, dat wi Minschen "Gott sünd" bit in de letzt Kleinigkeit.

Dat Wiederentwickeln vun Weiten, Wohlgahn un Macht lett sik in all Rebeden in en jümmer wieder stiegen Kurv teiken. Tonahm vun de Minschen, technische un medezinsche Fortschritt — en Prodkutschoonswassen in de Massen. Dortau höört dat Papeer und de Druckkunst: Bäuker warden vun en Parl to Ramschwoor. Dat geduldig Papier lett sik as Papeergeld massenwies drucken, sodat de Staatsschulden weltwiet wat Alldäägliches warden.

Een Tsunamiwell buut sik dor up. Wannehr ward se kippen? Is dat de Islam, de de Well to't Kippen bringt? De Hatt ahn Gnaad ut Ieversucht up de friee Leiv? Wenn en Leiharbeider dat Spionaaschsystem vun de USA verraden kann, denn kann ok en Tschetschenin an'n 1. vun'n Maimaand in'n Naam vun al-Qaida en russisch Rakeet starten.


Bild Rudi Witzke

De Minsch verspeelt sien Frieheit. De Frieheit, arbeiden un schaffen to könen. Dorför will hei Konsum, Wollstand, Geneten un Jux. Hei ward to en Kind, dat Toflucht söcht bi Vadder Staat, Hotel Mami un religiösen Fundamentalismus.

Wokeen hett den sportlichen Iehrgiez, up de sik överslaan Well to sürfen?


Platt: Rudi Witzke
Bild Wöddel: WolfD59/Wikimedia Commons

18.12.2013


na baven