Dat kannst mi glööven!
Dei Fortschritt

vun Maike Wagenaar


To'n Anhören hier klicken:


Lesen deit Maike Wagenaar.


"Kom man eben bi mi", säh dei Opa an sien Enkel. "Ik sall di watt vertellen van frauger."
"Opa, dat is doch langwielich, künnen wi neit mitnanner Computer spölen?"
"Jung, as ik so old was as du, door gaff datt nog hei kein Computers!"
"Opa, dat kann neit wesen! Wau hebben ji dan inköfft? Un wormit hebben ji spöölt? Un wau hebben ji Dingen nakeken, dei ji neit wussen? Du meinst doch neit, dat du al leeft hest, as dei Welt nog neit bestunn?"

Dei Opa schmüstert, ook wiel hei dei Lütje nu doch packt haar mit sien Geschicht.

"Ja, mien Jung, as ik so old was as du, door bin ik tau Faut naar dei Skaul gaan, dei heile 3 Kilometer, jeide Dag, bi Rött un Regen. Un wi hebben in Buten spöölt, Computers gaff dat neit und vööl Spöölgaud haaren wi ook neit. Wi hebben uns wat vermaakt mit dat, wat dat in Buten so gaff."
"Un haarn ji dann ein Handy, um oftauspreken, wenner ji jau treffen?"
"Handy, nee, dei gaff dat ook neit. Wi wassen einfach in Buten, un dei annern kwamen dann ook einfach."

"Opa, ober so einfach is dat neit, as ik mi mit Max treffen will, dann mut ik doch erst vraagen, off hei vandaag neit Klavier spöölt of Fautbaltraining hett."
"Tja, mien Jung, so wat gaff dat bi uns aal neit. Wi hebben uns sülst wat vermaakt, uns Ollen hebben wall föör uns sörgt, man neit dei heile Dag um uns docht, dei haaren anner Dinge in't Kopp. Un as ik so taurüg kiek, mut ik faststellen, dat dei Fortschritt in dei letzte 50 Joor gewaltig vörankomen is. Wi könen up dei Maan fleigen, Narichten in Sekunden um dei heile Welt stüren, overal un sünner Schnör telefoneeren und so vööl mehr mit dat Handy daun. Dei Autos fohren nu haast al allen un dei Maschienen könen al vööl van dat daun, wat Minschen frauger arbeid hebben. Of dei Welt dordöör betten worden is? Dat kann ik di neit segen! Ik heb neit dat Gefäul, dat dei Welt sekerder worden is, dei Minschken fredelker. Man ik bin gespannt, wau du dat süchst, wenn du so old worden büst as ik nu, mien Jung!"
"Opa, ik sall di dann ein SMS stüüren", seh dei Lütje — un beiden mussen lachen.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


Foto Kapell: Ole Nissen
2.7.2017


na baven