Plaan un Tofall

vun Joachim Kroll


Hüüt hebb ik'n ingelschen Spröök in't Internet funnen. In't Plattdüütsch översett heet he soveel as: "Du bruukst nich jümmers allens to planen. Af un to reckt dat, wenn du jüst atenst, vertroest, loslöttst un kiekst, wat passeert."

Wat'n schöön Spröök!, dacht ik. Un jo, dor is wat Wahret an. Avers villicht schull een för "af un to" "mehrstendeels" seggen. Oder gor "jümmers".
Denn: En Plaan to moken bedüüdt, den Tofall dör den Irrtum uttotuschen. Dat hebb ik mol an'e Wand op'n Lokus leest, as ik noch bi de Bundswehr weer. Den Spröök mutt een heel kloken un olen Filosoof dor ankleiht hebben. Tominst säh de Lokus so ut, as wenn he al wat öller weer. Un all to oft weer dat bi de Bundswehr jo ok so. Dor weer so männigeen Översten, de meen, he harr de Wiesheit mit'n Löpel freten. Man achteran? Allens leep dwars, un an Enn kregen de wat to hören, de nix för den Schlamassel kunnen.

Wobi: Gifft dat överhaupt Tofäll? Is nich allens, wat wi Minschen as Tofall betekent, so vörsehn? Göttlich Fügen? De heel grote kosmische Plaan? Un wenn wi denn anfangt, uns vun dat, wat vun heel boben vörgeven is, mit uns egen Plaan aftokoppeln...? —
Mooomang mol: Wenn allens, wat bi uns passeert, vörgeven is, also Vörsehung is, denn is jo ok vörsehen, dat wi egen Plaans mookt. Denn is jedeen Plaan, de een Minsch moken deit, keen egen Plaan, sünnern Deel vun'n helen kosmischen Plaan. Un uns Plaan warrt vun uns jüst so plaant, as dat vörsehen is. Un wenn wi denn an Enn nich dat rutkriegen doot, wat wi uns vörstellt hebbt, denn is dat, wat wi uns nich vörstellt hebbt, Deel vun'n kosmischen Plaan.

Mooomang mol! Kosmischer Plaan? Bedüüdt Plaan nich, den Tofall dör den Irrtum uttotuschen? Wenn allns dat, wat passeert, keen Tofall is, sünnern vun'n högere Macht plaant, en Plaan avers den Irrtum in sik dreegt, denn bedüüdt dat doch, dat allens, wat bi uns un wat uns passeert, en heel groten Irrtum is un allens verkehrt löppt. Na jo, wenn'k mi so in uns egen Land ümkiek oder dat Dagblatt lesen do oder de Narichten in't Radio höör oder in'e Flimmerkist kiek, jo, dann löppt allens verdwars un verkehrt in unse Welt.

Nu bün ik heel un deel döreenanner. Dor bitt sik de Katt doch sülvst in'n Steert. Un dat mutt wohl de Katt vun den olen Schrödinger sien. De is jo ok toglieks doot un lebennig. Avers villicht is dat ok so, dat ik dat allens mit mien dummerhaftigen Verstand gornich so recht op'e Reeg krieg. Ik mook mit mien "logisch Dinken" een Fehler: Villicht is dat dat Verstahn un de Bedüden vun "Glöven". Ik för mi will doran glöven, dat dat'n högere Macht gifft, de dat Leit vun jedeen Minschen in'e Hannen höllt. Avers nich een groot Leit för all de Minschen tosamen, sünner en lütt Leit, jüst so as'n Bindfaden för jedeen enkelten Minschen. Un de is mol länger un mol kötter. Un wi köönt no uns egen Willen uns Plaans moken un ümsetten. Un uns irren. Un över Tofäll freuen. Un af un to eenfach aten, vertroen, losloten un villicht en lütt beten dumm ut'e Kledaasch kieken, wenn wi dorop tööft, wat passeert.


10.5.2022


na baven