Tööv noch en beten
©  Pixelio, Alte Hände, Fotograf Michael Bührke
© Pixelio, Alte Hände, Fotograf Michael Bührke
Du sühst strahlen Ogen,
un jöögdenfrisches Bloot,
de feddern Schreed bargup. —
Du stiggst still in dien düster Huus.

Un so hett wedder allens sien Ornung.

 

Tööv ok du noch en beten
un du tappelst mit Stütten
dien Straat henlang un
wünscht den Naver "Goden Dag!"

Tööv noch en beten
un de, den du greutst,
ward wunnerlich nafragen:
"Wat will denn de up uns Eck?"

Tööv noch en beten.
De annern warden seggen:
"Den Olen seihn wi nich mehr,
weer doch Johre hier sien Padd."

In vullen Saft stünnen wi,
as wi hier Hüsung nähmen.
Strahlen Licht un düster Schadden
hebbt licht uns maakt un swoor. —

Daan hebbt wi mennig Saak,
wiss blifft de Spuur noch en Tiet.
Wulln woll noch dit un dat,
doch dat blifft nu vun uns ungedaan.

© Pixelio, Oma, Fotograf Michael Bührke
© Pixelio, Oma, Fotograf Michael Bührke

Rudi Witzke

25.2.2007


na baven