Dat kannst mi glööven!
Umkehren in'n Advent

vun Elisabeth Tobaben

To'n Anhören hier klicken:

Lesen deit Elisabeth Tobaben.

"Dree Minüten hefft wi hier hollen", seggt de Schaffner. "Dat is Tied genog to'n Utstiegen, nu geiht dat nich mehr!" As so'n Erzengel mit Flammenschweert steiht he vör de Döör von den Isenbahnwagen. Un denn fohrt de Zug ok al wedder loos. Vör uns harr en Froo Probleme hat mit ehrn Kuffer. De weer inklemmt ween in dat Gepäckfach un se kunn em dor nich ruutkriegen. Weer ook eenfach to vull in den Wagen. En Schoolklass müss op de anner Siet röver to jüm ehr Gepäck, un denn kömen ok al welke, de instiegen wullen. Een paar Mal harren wi ropen: "Stopp! Wi mööt noch ruut! Halt!" Harr ober nix nützt. "Dor achtern", sä de Schaffner, "sünd doch ok keen mehr utstegen", un wies nah dat Enn von den Zug.

Nu harren wi en Problem: Veer Lüüd ut unsen Chor un twee von de Schölers seten in en verkehrten Zug. Platz harren wi nu genog, to Eten un to Drinken harren wi ok, wi kunnen uns dat richtig komodig maken. Bloots doran, dat wi nu op en verkehrten Weg weren, änner sük dordör gor nix. Wi müssen torügg.

Mi geiht dör den Kopp, wat Jesus över dat Ümkehren seggt hett. Wenn wat verdwars lopen is in't Leven, denn helpt dat gor nix, irgendwo wat en lütt beten anners to maken.

Ik glöv, darüm ward dor ok faken nix von, wenn wi gode Vörsätze faten doot, afnehmen, mit dat Roken opholen, mehr Sport drieven off irgendwat anners. En ganz annern Weg to versöken, dat is jo ok nich so eenfach. Dat is meist so as Utwannern un en ganz anner Land nochmol nee anfangen.

Ankamen!

Tokamen Sünndag fiert wi den 1. Advent, dat is de Tied in't Karkenjohr, wo wi vööl över dat Thema Ümkehren nadenken dot. Villicht hevt Se jo Lust, dat mal to versöken? Kannst di bloß wunnern, wat mannigmal dorbi rutkamen deit. Tomals in de Isenbahn hevt wi versöcht, en anner Verbinnung to finnen, un — wat meenst du woll — wi weren sogor noch twee Minüten fröher dor as de annern.

Bi us up plattpartu.de finnt man nu utsöchte Bidräge van disse Radiosendung.