|
Sünnenbloom, drunken
vun warmen hellich Sünn,
leevt un lüücht mit ehr Blööt,
lockt Immen un Hummeln.
Elkeen Morgen grööt se.
Gode Daag mit uns' Bloom
… un de Sünn.
Bild: Rudi Witzke
Swatt törmt sik de Wulk.
Düüsternis krüppt över't Land.
Harvstwinnen susen.
Bild: Rudi Witzke
Ducknackt de Blööt, to schütten
Saat un Samen för kamen Tiet.
Fröhjohr kümmt bald
… un de Sünn
Bild: Rudi Witzke
Wull vunmorgen
besöken mien Sünnenbloom
un de Wöör
vun Lüchen un vun Schütten.
Doch wat is dat?
Swatt breidt sik ut, blot swatt
un överall dat Root vun Bloot.
Swatt un Root! Root un Swatt!
In't Kiekschapp
en söte Deern:
Se singt en Leed
vun Hatt un Mord.
Un dat Gesicht warrt
to en wööst Fratz.
Weer dat in Gaza?
Orrer Hebron?
De Straat vull Mannslüüd,
Pistool in'e Hand,
de Köpp hüllt deep
in Döker.
Schrien Mord un Doot!
Uns Liever sünd Bomben!
Weer dat in Gaza?
Orrer Hebron?
Verbagen Blick un Iesen,
Rook liggt in de Luft.
Bloot överall un
Schriegen, Stöhnen.
Minschen starven.
En Bomb güng hooch.
Weer dat in Haifa?
Orrer Jaffa?
Blitzen in'e Nacht,
Geknatter, Bumsen, Rumsen!
Füür flackert up, Bloot flütt.
Minschen starven.
Stoff bitt in de Ogen.
De israeelsche Anter!
Weer dat in Gaza?
Orrer Hebron?
Trüch wenn ik mien Blick,
hen na de Sünnenbloom.
Bloom vun Freden!
Hatt un Mord regeert de Welt
Minschen mütt seihn,
de Bloom, de blöht,
wenn ok man lütt,
in Haifa, Gaza orrer Bagdad.
Uns Kerz in'n Advent
mutt heller lüchen
as alle Füür tosamen,
uns Fredens-Sünn heller lüchen
as Hamas un Dschihad,
Saddam un El Kaida,
vun minnachten Verbreker
överall in de Welt.
Willt beden för
en Sünnenbloom-Licht
in Kabul, Bagdad, Istanbul,
Mali, Haifa, Gaza,
överall wo blinde Hatt regeert!
Willt beden,
för Barm un Leev in Harten,
för Freden up de Eerd.
|
