Dat kannst mi glööven!
Hoogen Besöök — de Sternsingers

vun Heinrich Siefer


To'n Anhören hier klicken:
Lesen deit Heinrich Siefer.


Gistern hebb ik hoogen Besöök hat. Bi mi vör de Huusdöörn stünnen Käönige — dat hett Kinner, de sick as Käönige torechte maakt harn — mit fierlicke Gewänder un gollen Kronen up 'n Kopp. Dat wörn de Sternsingers, de uk diese Daage weer an veele Stäen van Huus to Huus trecken doot. Dor, wor ehr de Lüüe de Dööre open maakt, bringt se de Böskup van Wiehnachten in 't Huus un singet:

"Wi kaamet wiet her ut dat Morgenland.
De Steern giv us Leit un Gott sien Hand.
Wi wünsket jau aale een glücksegens Neijohr —
Kaspar, Melchior un Balthasar."

Se wörn, so vertellt de Bibel, de eersten Besöökers ut de domals bekannte Welt bi 't Kind innen Stall van Bethlehem.

De meisten Lüüe frait sik över dissen Besöök un de gooden Wünske un spendeert de Sternsingers gern wat för ehren Klingelbüdel. Över 45 Millionen Euro hebbt se so verleeden Johr för Kinner in de wieden Welt sammeln kunnt. De Sternsingeraktion giv dat all siet 1959 — un se is vandaage gor nich mehr wegtodenken. Mehr as een halve Millionen Junges un Wichters gaht van Huus to Huus un helpet mit, dat Kinner, de dat nich so good hebbt, beter leven kännt.

Un doch ist de Sternsingeraktion nich bloß Geldsammeln. De Kinner sammelt bi de enkelden Hüüser nich blots wat in — se laatet uk wat dor: Gotts Segen. Mit Kriede schrievt se de Johrestahl 2019 an den Döörnposten un dortüsken de Bookstaben "C+M+B". So is de latienske Satz "Christus mansionem benedicat" affköttet. Dat hett so veel as: "Mag Christus dit Huus sienen Segen geven."

Wenn de Sternsingers naa ehre Tour weer trügge kaamt, könnt se 'n masse vertellen: Denn an jede Huusdörn wedd pingelt. Nich aale Lüüe maakt ehr de Döörn open, man de meisten frait sik över den hoogen Besöök, so as ik. Un manges een giv nich blots wat in de Sammelbüssen. Wecke hebbt uk noch wat Söötes för de Kinner up de Hand.

Sik up 'n Patt maaken, sik Tied för annere nehmen, frömder Lüüe besööken, för Kinner in Not sammeln un sik dorbi noch kolle Ohrn un Hanne holen — wat de Kinner mit ehr Sternsingen tostanne bringt, verdeent Respekt. De Sternsingers bringt nich bloß Segen, se sünd uk een Segen.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


Biller: Rudi Witzke

21.4.2019


na baven