Dat kannst mi glööven!
Över 't Waoter gaohn

vun Heinrich Siefer

To'n Anhören hier klicken:
Lesen deit Heinrich Siefer.

Verläden Sömmer kunn man in de Stadt Mönster över 't Waoter gaohn. Een Kunstprojekt van de Düütsch-Türkin Ayse Erkmen har dat mögelk maoket. De Lüüe kunnen över een Steg, de so deip in 't Waoter leggt was, dat he nich to seihn was, in 'n Haofen van Mönster över 'n Dortmund-Ems-Kanaol gaohn. Wat Maut hörde dor woll to, sik dat to waogen. Dor was ja kien Weg to seihn. Den kunns bloß unner de Fööt spöören. Un hen- un herschaukeln dö de Steg uk noch. Man en Büld Lüüe hebbt sik Schauhe un Strümmpe utrocken, de Bücksen hochkrempelt un sünd losmarschiert. De een of anner wisse uk mit 'n bäten wat raor Geföhl in 'n Maogen. Wat heff de Lüüe dor hentrocken? Dat Geföhl, seeker to Faute dor langes to gaohn, wor de Deipte luuert un een verschluuken kann?

Ik mössde dorbi glieks an de Geschichte in de Bibel denken, wor Jesus över 't Waoter gaohn deit. Hento up de Jüngers in 't Boot up 'n See Genezareth: Dat Boot, all wiet weg van 't Land. Düüster Nacht. Wind. Dat Fiskerboot kippeld hen un her. De Noot is groot. Mit'nmaol kummp Jesus up ehr to — över 't Waoter. Se kriegt üm nich forts in de Künne. Een Spijöök? Roopen! Schrien! Dann een Stömme. De kennden se: "Kopp hoch! Ji bruuk nich bange wäsen. Ik bün 't doch!" Petrus is de Eerste, de weer 'n Hart heff. Jesus is 't. Nu is aals weer good. Mehr noch. Petrus risked sik up. Stigg ut dat Boot. Stüürt liek up de Stömme to, över 't Waoter. Man dann: So as sien Maut minner wedd, giv uk dat Waoter naoh. He sacket deip un deiper hendaol. Hei röpp: "Jesus, help mi!" Un forts gripp Jesus Petrus sien Hand, luck üm weer nao baoven.

Is 't in 't Leven nich manges uk so? Et giff Tieden, dor mennst, di wedd de Bodden unner de Fäute wegtrocken. Wo good, wenn dor dann een bi di is, segg: "Bruukst nich bange wäsen. Ik bün ja bi di! Ik holl di!" Man, so dücht mi, hier geiht dat noch üm väl mehr as üm de Hannen van 'n gooden Frönd in mien Leven: Dor is een, de is dien lessde Grund un Bodden. De lätt di nie nich loss. Mit den kannst sogaor över 't Waoter gaohn: Jesus.

Mag wäsen, dat een bäten van dat Geföhl, de Lüüe uk draogen heff, de över den Steg dor in 'n Haofen van Mönster gaohn sünd.

Bi us up plattpartu.de finnt man nu utsöchte Bidräge van disse Radiosendung.