Dat
kannst mi glööven!
De Wunnersteern van Bethlehem
vun Heinrich Siefer
To'n Anhören hier klicken:
Lesen deit Heinrich Siefer.
Disse Daoge giv dat hoogen Besöök. De Steernsingers. Dor
frai ik mi all to. Üm den 6. Januar ümto trecket in'ne Riege
van Dörpen un Stadten Kinner van Huus to Huus un bringet Frädens-
un Segenswünske för 't neie Johr, verkleedt as de Könige
Caspar, Melchior un Balthasar.
De Beseuk van de dree Könige, maalt van
Giotto
Se wörn, so vertellt de Bibel, de eersten Besöökers
ut de domals bekannte wiede Welt an de Krippe bi 't Kind van Bethlehem.
Et giv en Büld Legenden över dat, wat de Könige dann
up 'n Trüggeweg belevet hebbt. Mit eene van miene leevsten dorvan
is de Geschichte van den Wunnersteern van Bethlehem. Un de geiht so:
Bethlehem leeg nu all 'nen Endken achter de drei Käönige.
Se wörn noch vuller Fraide van dat Beleven dor up 'n Eske in
den Stall. As se van einen lüttken Barg noch ein lessdet Maol
up de Stadt trüggekeeken, trauden se ehre Oogen nich. Wat was
dat? De Steern, de ehr de heile lange Tied den Weg bit hen naoh
Bethlehem wieset har, sprüng mit'nmaol in duusend un mehr as
duusend lüttke Steerns ut'nanner. Un disse Steerns verdeilden
sik gau över de heilen Eern.
De Käönige kunnen sik dor kienen Riem up maoken. Man
se harn dat drock. Ehr Weg naoh Huus was noch wiet. Un so trücken
sei mit ehre Kamele wieder. As sei an eine Krüüzung kömen,
wüssden se nich recht, wor 't nu wieder naohdaol gaohn schull.
Gaud, dat ehr dor jüst einer intomeute köm. Se frögen
üm naoh 'n Weg. Heil fröndlik sä hei ehr Bescheid.
Un glieks in den Oogenschlag, wor hei de Käönige in ehr
Not helpen dö, tinkelde över sienen Kopp ein lüttken
Steern.
Laote kägen Aobend, se wörn schmachtig un dootmeue in
eine Harbarge ankaomen, do passeierde dat Glieke mit den Wirt dor.
Hei bröchde ehr drock wat to Äten un to Drinken. Se bruukden
gor nich lange teuven. Un hei schnackde uk noch ein gaudet Woort
mit ehr. Un glieks blinkerde ein lüttken gollen Steern över
sienen Kopp.
Nu wüssden se 't. Nu harn se begräpen, wat dat mit den
Steern, de dor över Bethlehem in duusend un mehr as duusend
Deile ut'nannerbrocken was, bedüüden dö: Överall
dor, wor einer ein gaud Woort för den annern över heff,
överall dor, wor einer den annern helpen deit, wenn 'e eis
maol nich wieder weit, dor tinkelt un blinkert de Steern van Bethlehem
un mag wäsen, uk disse Daoge.
"Dat
kannst mi glööven!" is eine plattdütschke
Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke
Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.
Bi us up plattpartu.de finnt man nu utsöchte
Bidräge van disse Radiosendung.