Dat kannst mi glööven!
Maria — eine van us

vun Heinrich Siefer


To'n Anhören hier klicken:


Lesen deit Heinrich Siefer.


De Bogenbarg in Bayern is een bekannten Wallfahrtsort. Besünners in de Maitied pilgert dor 'n Masse Lüe hen. Dor giv dat ein heil interessant Marienbeld. Dat giv et so nich faoken. Wi kennt Maria mit dat Jesuskind up 'n Arm, off mit ehren dooen Säöhn up 'n Schoot. Man Biller, de wieset, wo Maria up de lessde Tied togeiht, so as dor up den Bogenbarg, giv dat bloß minne. Düüdelk seiht wi dor Marias rund buuket Liev. Ein Kind bargt sik bi ehr. Ehre Hannen ligget dor tosaomefaolt, wor dat Kind is. So kann man 't faoken bi väle Frauen seihn, wenn 'n Kind ünnerwegens is. Marie schinnt bliede to wäsen. Sei frait sik up dat Kind. Ünner ehr Hannen is ein Kläppken to seihn — mit 'n Kind d'rin affbild't. Et wieset Jesus. Hei steiht dor pielup in ehrn Buuk, as ein utwassen lüttken Menske. Wat heff sik de Billermaoker dor bi dacht, fraogt man sik.


Marienbild Bogenbarg

De Maria dor süht nich besünners moije ut. Dor is uk nich alltoväl gollen Klööer to seihn. Up 'n Kopp dregg se 'ne Krone. Ehr Gesicht wiest ehrder dat Gesicht van ein einfachet Buuernwicht, villicht as van eint dor up den Bogenbarg.

Un so seiht wi Katholschen dat mit Maria ja uk: Se is eine van us, ein Menschk jüst as wi. Man se heff sik heil up Gott inlaoten. Maria kann as ein Spägel för us wäsen. Se heff Jesus to de Welt brocht. Un dat is eine Upgaov för aale Mensken, to aale Tieden, un nich bloss för Fraulüe. Dat is uk noch vandaoge use Saoke. Use Gloven wedd uk in tokaomen Tieden noch leven, wenn wi immer weer van Neien Gott to de Welt bringen daut. Bloß so kann use Gloven naohjungen.


Gnadenaltaor Bogenbarg

Man kann dit Bild over uk noch van ein anner Siet bekieken. Villicht kann 't us uk dit wies weern laoten: Kinner sünd neischierig, fraogt naoh, sünd immer togange, hebbt väl Tovertruun. Dat is dat Kind in us. Uk dat mott immer weer van Neien to de Welt brocht weern. Wecker mit Tovertruun up anner Mensken togeiht, de sett't wat in Gang: de sörgt mit dorför, dat Tovertruun ünner de Mensken wasset.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


30.7.2017


na baven