Dat kannst mi glööven!
"In een van jau is de Messias!"

vun Alxander Rolfes

To'n Anhören hier klicken:

Lesen deit Alexander Rolfes.

Dor was eis maol 'n Kloster, so vertellt eine olde Geschichte, dor löppde dat nich mehr so recht. To de Gottesdeenste kömen immer minner Lüüe. In 't Kloster inträen wull uk so recht kiener mehr. So schluffkeden dor bloß noch ein poor öllere Mönche den Krüüzgäng hendaol. Dat Bäen un Singen was uk nich mehr dat, wat et all maol wäsen was. Dichte bi 't waohnde ein Rabbi in eine lüttke Kaote. De köm off un an ton Fasten un Bäen in 't Kloster. Un wenn he dor was, scheen dat Leven in 't Kloster wat lichter. Et was, as wenn den Rabbi sien Bäen de Mönche ehr Bäen mitdrägen dö. Tominnst spörden se dat so.

De Abt maokt sik eins gauen Daoges up 'n Padd nao den Rabbi. He söch Raot. Noch in de Döörn drücket de Rabbi den Abt an sien Harte un laodet üm fründlick in 't Huus. Dor ligg midden up 'n Disk aopenschlao'en de Hillige Schrift. Se sittet dor 'ne Tied lang ümto un schwieget. "Du un diene Bräuers", mennt do de Rabbi, "ih hebbt vergäten, wat jau Leven riek maoken deit. Ik gäv di einen Raot, man den dröffst du bloß einmaol wiedergäven. In einen van jau waohnt de Messias!"

Glieks annern Morgen röpp de de Abt de Mönche binanner, kick se de Riege nao an un mennt: "De Rabbi heff seggt: In einen van us waohnt de Messias!"

Toerste begriepet se nich recht, wat de Abt dor seggt heff. Man dann fraogt se sik, wecker dor woll mit mennt wäsen kann: Villicht Brauer Thomas, off Brauer Johannes? Villicht uk Paoter Markus? Von den Dag off an wüdd dat Leven in 't Kloster anners: fröndlicker, reeller, worhaftiger. Dat Bäen un Singen kreeg weer 'n anner Klööer. Lüüe hörden dorvan. Kömen van wiet un siet. Dag för Dag immer mehr. Uk de leddigen Plätze in 't Chor wüdden minner. De Bräuers harn weerfunnen, wat se verlaoren harn.

Eine moje Geschichte. Gefallt mi allerbest. Passt uk in use Tied. Klaogen un Jammern över dat, wat sik in de Karken deit of jüst nich deit, helpet nich väle. Et kummp d'rp an, wat in de Midde up 'n Disk liggen deit, unner us waohnen deit. Gotts Woort, dat in us lebennig weern will. Wat ein fröndlick Gesicht, ein gaudet Woort in de Welt utrichten kann, dat wieset up Stäe Paopst Franziskus. Un sien Böskup is ja uk nicks anners as dat he seggt: Gott waohnt in jau! In jeden van jau!

Bi us up plattpartu.de finnt man nu utsöchte Bidräge van disse Radiosendung.