Frère Roger is doot
12.5.1915 — 16.08.2005

Spraak findt keen Wöör, Sang keen Toon.
So laat uns tosamen vör en Ikoon ut Taizé still warden,
en Ikoon, vör de Frère Roger faken beedt
un de he uns verklort hett:

Taizé-Ikoon
Taizé-Ikoon

"Ikonen helpen dorbi, dat in't Beden Schöönheit ehr Steed hett.
Se sünd liek Finster, de hen na dat würklich Riek vun Gott apen sünd
un diss würklich Riek opstünns sien laten, wo Minschen up de Eerd beden.
Ikonen sünd twors Biller, aver keen Bebillern orrer gor Smuck.
Se sünd Teiken vun't Minschwarden,
se bringen de Ogen de hillige Bott,
de dat Ohr vun de Welt wies ward.
Fröher hett nüms Gott,
de nich to seihn is un keen' Lief hett,
in jicheens Wies dorstellt.
Nu aver, wo Gott sik as Fleesch wiest un ünner uns wahnt hett,
stellt en Ikoon dat vun Gott dor, wat vun Gott dat Sichtige sien kunn.
De Ikoon laadt uns in, dat Geheemnis in'n Gloven
ok mit'n Lief in de Schöppen uptonehmen."

Un so willt wi vör dat Afbild vun de Ikoon beden.
Wi willt in't Gegenöver mit Jesus unsen Frère danken,
dat he uns kloor Sicht geven hett, wo Nevel weer,
dat he uns dat Laven un Singen liehrt hett,
de Leev to elkeen un allens, wat levt.

Groot Truur is in uns!
Nu levt Frère Roger in anner Wies, un mit sien Wöör willt wi gahn.


Rudi Witzke

21.8.2005


na baven