Dat kannst mi glööven!
Buuten un Binnen

vun Daniela Rippe


To'n Anhören hier klicken:


Lesen deit Daniela Rippe.


Ick weit noch ganz genau, wie ick dat eierste Maol mit mienen Leiwsten ünnerwägens wör un hoge Schaue an har. Ein'n Dag löter frög mi miene Fröndin: "Bis du grötter as hei?" Nee, wi sünd beide glieke groot, aower wenn ick hoge Schaue an häbbe, dann schinnt dat so. Sei mennde, "Dat lätt nich gaud!", un "Hei passt nich tau di!".
"Wat du dor schnackes", häbb ick bi mi dacht, "mien Frönd schall nich tau mi passen, blots weil hei ein bäten lüttker is as ick?"

Wat meent gi? Dor hört ja wohl ein bäten mehr tau off einer tau einen passet, as blots dei Grötte?

Nu bün ick nich dei Lüttkeste. Mit einmeterfiefunachzig fallt man as Frau woll up un man mott bi't Bücksenkoopen all gaud hennkieken. Man eins will ick jau nu maol vertellen:

In mien heilet Läwen häbb ick noch kienen Menschken kennenlehrt, mit den ick so väl Spaoß un Fraide beläwet häbbe, mit den ick so gaude Gespräche hatt häbbe un bi den ick mi so wohl feuhle, as bi mien Leiwsten. Wi häbbt ein ganzen Bült glieke Interessen, mäögt beide dat Süftige un käönt äöwer us lachen. Hei häff mi lehrt, dat man nich blots feine düre Plünnen un ein grootet Auto bruuket um glücklick tau wäsen. Ehrder ick üm noch nich kennt häbb, häbb ick morgens lange vör 'n Spägel stoahn, miene Hoore richtet un mien Gesicht anmaolt. Wat dat an Tied duurt häff! Ick mennde, dat mössde so wäsen, ick was anners mit mi nich taufräe wäsen. Jao, un dann köm dor mien Leiwsten in mien Läwen — un dei seehg dat aals heil anners. Ick markde mit 'n maol, dat dat dor nich up ankummp, wie einer utsüht off wat hei off sei up dei Bank häbbt. Dat einzige is doch, so düchde mi bold, is doch blots, off einer taufräe mit sick is.

Un wo süht hei dat, mien Leiwsten? Wenn hei dor ein Problem mit har, dann was hei uck nich mit sück taufräe. Un hei sägg jümmers tau mi, dat hei stolt up siene Frau is, dei ein bäten wat grööter as hei is. Wat einer is un wat einen utmaoket, is nich dat, wat man van buuten seihn kann. Dat kumm dorup an, wo't binnen utsüht.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


28.5.2017


na baven