Passion

Biller vun Rudi Witzke, Wöör vun Marlou Lessing. — Se köönt de Biller per Klick vergröttern.


 

  Invocavit
verlichtern un fraag

to en liedensweg
bün ik inbestellt
dat is nich mien liedensweg
nich mien
sünnern dien.

wat geiht't mi an?

         
Reminiscere
erinnern un nich-erinnern

wat
geiht't mi an?
ik weet, dat
ik't weet
ik laat
mi nich
an denken

wenn
ik an denken wöör
wöör
ik mi erinnern.

   

 

Oculi
mit oogen sehn

op min egen weg
sünd min oogen richt.
min egen lieden
kann ik föhlen.
blind
kiek ik op, seh
objekte
de leevt, sik beweegt, mit mi
kollideert —
wat se atent, wat se liedt — wat geiht't mi an?
för mi sülven
kann ik föhlen.
süss nix.

min blick bohrt sik dal in min weg.
mi warrt slecht vun mi sülvst.

weer ik
nich blind,
wat
wöör ik föhlen?
gifft't
een, de nich fraagt: wat geiht't mi an...?

drüppen fallt
mi in de oogen:
dat ies
daut.

         
Laetare
de unmöögliche opgaav

de tied stiggt an;
sachen geiht se un swaar as
an en anbarg, en hogen hang.

wat
hett ehr hoges aten
in min bost verlaren?
wat
din last
op min hart?
— wat geiht't mi an, wat mi't angeiht?
düt is min weg.

mal
heet dat
warr ik juchhein vör freid.
ik glööv dat nich.

nich op den kamm
vun düssen barg.
nich vun den utkiek —
ik glööv dat nich.

mal
warr ik juchhein...

wat seggst du?

         
  Judica
richten

bargtopp.
verhalen.
utkiek.
bild:

feern: dat land vun de lebennigen.
dorvör:
en welt
vun nevel.
de hand sühst nich vör oogen.

sehn
is nix nütt. den padd
mutt ik anners weten.

richt
mi, gott,
dat hart.

 

 

         
Palmarum

dalgahn
vun den barg
in den nevel
ahn sicht
luustern
na en stimm, de nich fraagt: wat geiht't mi an?
dor
is de richt,
de weg.

de nevel warrt licht:
de welt is
en palmengoorn
vör't land vun de lebennigen.


9.4.2006


na baven