Fiern bi Corona

vun Martin Ripp


Dat weer Anfang Januor 2021. Ella harr de Kaffeemaschien anmokt un keek dörch dat Kökenfinster in den Vörgaarn. Glieks möten de Kinner kamen. Se dörfen ja bloots to drütt op Besöök gahn. Een mutt to Huus blieven.

Dor harrn se verleden Johr Glück hat! Tachentig weer en Grund, utladen to fiern. Ella harr in't "Zollenspieker Fährhuus" en Ruum för tweeundöttig Gäst reserveren laten. Dat güng nu nich mehr!

Up Tied weer de Wagen ünnert Carport fohrn. Se güngen de Trepp hooch un blieven vör de Döör stahn. Ella reep: „Hermann, maak de Döör op, de Kinner sünd dor!“
Se gung achter em, ehr Smartphone praat för dat Foto.

Swiegerdochter Melanie hett lacht un fröög: „Ella, woans finnst du uns Schnutenpullis?“
Se harr een Snutdauk in root. Dat vun Paul weer geel. Julia harr ene Mask mit Leoparden-Munster. Daniel as St.-Pauli-Fan harr de swatte Mask mit Dodenkopp ümbunnen.

Paul is söventeihn un intwüschen en half Kopp grötter as sien Moder. Julia weer groot vör twölf un harr ehrn twee Johr ölleren Broder Daniel binah inhaalt.
Jedereen harr ene geele Roos inne Hand. Se nohmen Hermann in de Mitt un de gung ut Spaaß in de Knee. Mit de gediegen FFP2-Mask weer he de witt Plack. Ella müss grienen. Sien Snuut gleek en Mullwarp. Un denn süngen se in'n Choor: „Wo schöön, dat du boren büst...“
Dat weer eenmalig buntig Bild för das Familienalbum!

Bevör se an den Kaffeedisch gungen, haal Melanie de Blomen för Ella ut'n Kufferruum. Julia lachde und see: „Oma, dat weer de lest Struuß von de Tanke. Nich schöön, aver besünners! De Blomenladens sünd ja ok in Lockdown!“

Melanie see: „Sebastian harr sik al afmeld in sien Firma, dor keem de Opdrag, dat Klock veer en wichtige Videokonferenz is. Dorüm is Paul mitkamen.“
„Opa, dat weer miene Idee to knobeln!“, see Julia stolt. „Mama harr ene fief. Daniel ene dree. Paul bloots ene twee. Ik dörf ja so mit, Kinner ünner veerteihn tellen ja nich! Utrekent Papa hett ene Söss smeten un mutt to Huus blieven, un dat, wo sien Vadder Gebuursdag hett!“


Zoom-Konferenz

Ella sä: „Ja, dat is schaad, aver Opa un ik freuen uns ok, dat uns öllst Enkel dor is! — Ji maakt doch all Homeoffice, hebbt ji ok solk Konferenzen?“
Paul lach. „Ne Oma, bloots dien Söhn! Wi Kinner maakt 'Homeschooling' un bi dien Swiegerdochter heet dat 'Kurzarbeit'!“

Melanie froog ehrn Swiegervader: „Weerst du trurig as Kind, glieks na de Fierdaag Geburtsdag to hebben?“
„Ne, ik weer sogar över de Tiet! Mien Öllern harrn an'n 31. Dezember mit mi rekent.“
De plietsche Julia reagier foorts: „Opa, denn harrst du nich Hermann heten, sünnern Sylvester!“
All lachden.

Hermann harr twee Stück Koken eten un nehm dat Blatt ut't Kumveert. Een Teken vun Julia: Lokaal mit Sömmergoorn. Dorünner harr se schreven:

Eten-Goodschien
Leve Papa un Opa,
Lokaal na dien Wahl!
Tosamen mit uns un Oma
na 'Corona'!

Hermann dankde un sä: „Ik heff Langewiel. Sport mit mien Kumpels is nich mehr möglich. Vörher güngen Oma un ik eenmal inne Week to'n Swemmen. Kegeln mit mien anner Kameraden
geiht ok nich! Na de tweete Sprütt gegen Corona will ik mien fröher Arbeidgever fragen, ob ik wat för hum doon kann. So en beten Homeoffice kann ik mi noch totrauen!“
„Kloor, Opa!“, stimmte Paul to. „Bevör di de Deek op'n Kopp fallt!“
Un Daniel see: „Opa, du büst ok ahn de Sprütten för uns systemrelevant!“


8.10.2021


na baven