Fief
Wihnachtsleeder ut fief Länner vun Behrend Böckmann "Wennihr is dat wäsen?", will einer weiten un 'n anner antert: "Dor büst du noch mit'e Trummel üm'n Dannenbom lopen!" wer so orrer so möt sik dei Komponistin un Pianistin Katherine Kermicol Davis (1892-1980) 'n Bild von' Jungen mit'n Trummel måkt hemm'. Denn sei wier dat, dei 1941 Text un Musik von "The Carol of the Drum" infollen sünd. Un dit Lied wür inne Staaten ganz fix 'n nieget Wihnachtsleed.
Un dat güng tau Harten, denn vertellt ward dei Geschicht von'n lütten Jungen, dei so wenig inne Melk tau krümen harr, dat hei kein Gåv för't Kind inne Krüff upbringen, wer dorför wat up sien Trummel vördrägen künn. Un in't Invernähmen mit Maria is denn dat "pa rum pum pum" tau hürn un dei Lütt hett mit dat Trummeln nich nålåten, bet dat Kind inne Krüff em un sien Trummel angrient hett. Ümmer wedder wür dit Leed tau Wihnachten spält, nie upnåhmen, nie "arrangiert", as man so secht, un ward 1951 dörch den Chor von Harry Moses Simeone (1911-2005) landswiet bekannt.
Un 1957/58 ward dörch niege Arrangement ut den "Carol of the Drum" dei "Little Drummer Boy". Un so ward dit Leed as dat niege Wihnachtsleed binnen körtester Tiet taun amerikanschen "Wihnachts-Klassiker". All willen den "Little Drummer Boy" singen un all willen Geld mit em måken. Af disse Tiet geef dat so anne 150 Upnåhmen von un mit väle bekannte Sängers un Orchesters un 25 Milljonen Schallplatten würn dorvon bet 2005 verköfft. 1977 hett Bing Crosby dit "pa ram pam pam pa ram pam pam pam" in'n Duett mit David Bowie sungen, ein Upnåhm, dei hüt noch giern hürt un spält ward. wer ok Sängers as Peter Alexander, Marlene Dietrich, Karel Gott, Bob Dylan, Sascha Distel, Johnny Cash, Udo Jürgers, Elvis Presley, dei Wiener Sängerknåben, dei Kelly-Family, André Rieu un väle, väle anner harrn ehr'n Spåß an den lütten Trummler. As Wihnachtsvideo wür "Dei lütte Trummler" in't Johr 2014 von 23 Milljonen "User" anklickt. Dortau hett dat kein anner instellt Video bröcht. 26.12.2023
|