Fief Wihnachtsleeder ut fief Länner
Feliz Navidad

vun Behrend Böckmann

José Feliciano (geb. 1945) is von Kind an blind. Dor man in sien Heimat Puerto Rico nicks gägen sien Blindheit daun künn, siedelt dei Fomilie 1950 nå Harlem (New York) œwer. Ok dor kann em nich dull hulpen warden, œwer hei hett denn Willen, Musik tau måken. Hei spält bald Gitarr’ un ok up’e Quetschfiedel, hei hürt Rockmusik, verlött dei Schaul un versöcht, mit Musik bäten Geld tau verdeinen. Tauierst in Detroit, denn in Argentinien un denn wedder in Amerika, œwer in Los Angeles. Hei komponiert sülben, singt sien Leeder un måkt Upnåhmen, dei sik bestens verköpen leeten. 1968 ward hei dei „All Best Artist Of The Year“, œwer sien Stimm’ gägen den Vietmankrieg bringt em nich blot Frünn’ in. Dorüm möt hei dull marachen, üm wedder Anseihn tau winnen, un denn kriecht hei 1987 ’n Stiern up den „Hollywood Walk of Fame“ — un af 1995 drächt ’n Schaul in New York sienen Nåmen. Hei spält Gitarr, singt up Spaansch un Inglisch, komponiert...

1970 keem em „Feliz Navidad“ as Wihnachtsleed in’n Sinn. In fief Minuten wier dei Mischung ut Spaansch un Inglisch fardig: drei Akkorde för dei Gitarr’ wiern fix funnen tau 21 mål „Feliz Navidad“ un nägen mål „Ik wünsch juch von Harten fröhliche Wihnachten un ’n glücklich Niejohr“. Mihr Text gifft dat nich. Œwer dat möt wull nich ümmer väl Text sien, üm ut nicks ’n „Hit“ tau måken. Mål so un mål so sungen is „Feliz Navidad“ œwerall dor tau hürn, wo Wihnachten fieert ward. Un näben José Filiciano singen Boney M, Céline Dion, dei Jungen Tenöre, Frans Bauer, Nicole, Matthias Reim, Semino Rossi, Tom Astor un väle anner dit niege Wihnachtsleed in’n Latino-Rhythmus. Ünner ’n Utwåhl von 25 bekannte Wihnachtsleeder licht „Feliz Navidad“ inne USA up Platz 15.