All, dei sik mit Katten afgäben, hemm' siet 'n por Johr ok ehrn Fierdach, den
Weltkattendach an'n 8. August!

As ik lütt wier, geef dat ok Katten up unsen Hoff. Sei harrn kein grötter Anseihn as Kauh un Schwien, as Gant un Schap. Un so as dei Häuhner mit "tuck-tuck" raupen würn, keemen dei Katten bi "miez-miez!" an ehr Frätnapp ünner dei Waderbänk inne Kœk. Un dor fünnen sei dat, wat von't Meddachäten nåbläben wier. Up't Kannapäh un inne Bedden harrn dei Katten ok nicks tau säuken. Ehr Revier wier dei Gorn un dei Wisch achter't Hus orrer dei Kuurn- un Heubœn, wo's as Musjäger ünnerwägens wiern. Un wenn't mal dull kolt wür, künnen's vonne Schündäl ut in'n warmen Kauh- orrer Schwienstall rinnerwutschen. Keinein hett dunnemals an't Kastrieren dacht, dei Katt süll Katt blieben un dei Geburtenrägelung wür vörnahmen up'n Oort, dei so hüt nich mihr mœglich is.

Hett 'n Katt dei Küken jaacht un fräten, denn wür ok mal korten Prozess måkt un ehr dat Fell oewer dei Uhren treckt un fien garwt. So keem man taun Kattenfell, dat 'n gägen allerlei Weihdach verwennen künn.

Vertellt ward, dat in Hunger- un Kriegstieden 'n Katt as Dackhaas up'n Töller lannt is; un vertellt ward wiederhen, dat Ganoven in Asien Katten as Hasen verköpen un dei Verköper hüt ut dissen Grund Kaninken ümmer mit'n Pot anbeiden möt. Katten warden in China, Vietnam un Korea, œwer ok in Peru, England un Niegen Seeland un inne Toscana äten. Siet 2010 is dei Hannel mit Kattenfleisch in Dütschland un dei Hannel mit Kattenfellen inne EU verbåden.

Kattenfrünn' wullen nich mihr länger tauseihn, woans Katten malträtiert würn, un hemm' nå un nå dei Katt von'n Husdiert in'n Fomilienmitglied ümwannelt. Hüt warden in Düütschland bummelig bäten mihr as 8 Milljonen Katten hollen. Katten liggen dormit up Platz 1 vör dei Hunn' mit ca. 5,5 Milljonen.

All disse Katten sünd kein Musjäger mihr, sei mœten sik nich mihr sülben versorgen — so as dei twei Milljonen, dei noch in Düütschland ümherströpern un kein Tauhus hemm'.

Nich mihr dat Kattenfell, sonnern dei Katt sülben helpt gägen Weihdach. Sei schnurrt un kuschelt un dat deit gaut, sei schlöppt an'n Dach un geiht up't Kattenklo, sei is eigensinnig un hürt nich so as'n Hund. Liekers sünd Katten den Düütschen sien leiwstet Kind. Sei sallen 1,5 Milliarden €uro in'n Johr für Kattenfauder un annern Kram utgäben — un so bannig väl för all dei Höker daun, dei mit Katten ehr Geld verdeinen.