En Angeliter vertellt:
Urlaubsbeleevnis

vun Helmut Marxen


Wat hett mi disse Sommer doch feine Urlaubsdaag bröcht. So recht utspannt heff ik, dorbi bekannte Lüüd vun fröher weddersehn un so af un to ok extra fein spiest. Mehr kannst in Urlaubstiet nich verlangen. Dorbi weer'n mien Fru un ik dit Johr överhaupt nich verreist.


Lütt Goorn. Bild: Wikimedia Commons

Wi harrn uns doröver eenigt, dat wi disse Sommer över nich op Reis gahn wulln. Unse Urlaub weer tomehrst in unse Goorn op Terrassinien. Dat heet, tomehrst is egentlich verkehrt, denn meisttiets hett uns dat Wedder so'n beten in Stich laten. Sodennig hem wi dat jo alltohoop hier in unse Eck nich veel anners hatt. Aver to Huus regent dat nu mal örnlich wat billiger. Nix kann mi mehr argern, as dagsöver ut so'n lütte Urlaubsquarteer op dat pladderige Butenvör to kieken.


Slecht Weder. Foto: Michael Hoffmann/Wikimedia Commons


Bild: Wikimedia Commons

As Petrus ok na rieklich acht Daag de Kraam nich ännert kreeg, dor harr ik egentlich noog utspannt, düchte mi. Anfang de tweete Week wull ik nu en Stuuv nü tapezeern un in mien Klüterkeller en Eck mit Spaanplatten afkleeden. Aver jüst dor keem mi bi de Fröhkost en Notiz in dat Blatt ünner de Nees, dor stunn wat vun "Umweltschadstoffe" in. Dat gung üm Gifttüügs, wat uns de Industrie heemlich ünnerjubeln deit. Is mitünner ok in Liem inröhrt, womit Spaanplatten kliestert warrn. Un de waschfaste Tapet, de ik al köfft harr, weer ok nix un blieven gesund bi. Weer Kunststoff in, de kunn villicht potschent maken.

So leet ik dat mit de Klüterkraam un dat Tapetengekliester un döse wieder dörch mien Urlaub bi't Huus. Vun de Welt rundüm kregen mien Fru un ik rieklich to weten dörch Ansichtskoorten, de uns vun överall mit de Post in't Huus kaam deen. En Vedder schreef en Koort vun dat sonnige Mallorca, en Naver leet gröten ut dat "Sonnenparadies an der Adria". Noch schöner weer dat, schreef uns en üm dree Ecken Verwandte, ganz baven "im Land der Mitternachtssonne". Nu wüssen wi denn, wodennig dat överall utsehn dee. Woför schulln wi uns wull sülms noch op de Socken maken? En Koort ut Griechenland runne dat Ansichtskoorten-Panorama op mien Schriefdisch af. Keem mit Gröten "aus dem schönsten Urlaubsland" vun en Bekannte un weer för uns en richtige Överraschung. Wi harrn de Keerl al wat länger för doot hooln, denn wi harrn ewige Tieden nix mehr vun em hört.

Denn keem unse Urlaubsdeel mit dat Weddersehn vun leve Gesichter. Fröh Klock halvig acht op en Sünndag, de uns wohrhaftig Sünnschien bringen wull, gung dat Telefon. Mien Fru ehr Kusien Alma, de wi vör Johrn bi en Familienfest in Köln toletzt sehn harrn, make Urlaub op'n Buernhoff an de Oostsee. Wull uns doch mal besöken un sehn, wo uns dat wull so gung. Schull man inkieken, glieks to Middag, sä mien Fru. Se weer verheiraat, wüssen wi. Aver dat se intwischen veer Kinner harr, dat wüssen wi eerst, as se mit Mann un Muus bi uns vör de Huusdöör stunn. De lütte Wippsteerten setten nett üm bi uns, Paradestück weer dat Middageten. De spaddeligen Krabauters möten jo wull satt wurrn sien, sünst na dat, wat se buten de Tellers na links un rechts op Dischdook un Teppich klackern deen, kunn man't binah nich gloven.

Besöcht hett uns denn ok noch, dat weer man wecke Daag later, en Bekannte mit Familie ut Hannover, de vun sien Urlaub in Dänemark retuur keem. Bi de Enn melle sik denn noch en Ehepoor, wat wi vör längere Tiet in Bayern kennenlehrt harrn. Maken Urlaub op Nordstrand un kregen unse Adress mal wedder utkraamt. Mien Fru kreeg för all unse Besöök opdischt, so geev dat ümschichtig feine Mahltieden. So recht wat för'n Urlaubsprogramm.


Fischsupp mit Miesmusseln in Wikimedia Commons — hm, lecker!

Achteran harrn wi denn aver ok noch'n poor Daag för uns alleen, sogor mit Sünnschien. Ik wull jo egentlich noch mien Jägertuun strieken, aver denn dache ik an dat Gift, wat doch villicht in de Farv sien kunn. So heff ik mi denn de Arbeit verknepen. Heff mi denn aver dorto dörchrungen, in Urlaubsluun af un to en lütte Buddel Beer mehr as sünst to riskeern. Nüms kann weten, wo lang Gentechnik un so uns ok in dat dore Rebeet noch reine Kraam garanteern.


27.9.2009


na baven