Een lang heegte Droom warrt wohr, wenn't endlich losgeiht mit dat Buen vun 'n egen Huus un — ji glöövt dat nich — to vertellen gifft dat, as bi Klås, un ...

De schiet Toilett

vun Klaus-Dieter Tüxen

Weer meern in 'n August 1978, 'n herrliche Sommerdag, un dat Huusbuen in Friedland all acht Wuchen in de Gangen. De Muerlüüd weer'n in de Anfangstiet flietig un röhrig, so dat nich blots de Keller, sonnern ok de Rohbu to even Eer gau vörankåmen weer.

Klås sien olen Nåvers ut Eckernför kemen geern mål vörbi, üm nå 't Rechte to kieken, un an düssen Nåmiddag weer dorför ok Grillen anseggt. Dat weer di een Spååß för all!

Wusst un Fleesch worrn to Kalorienbomben, un de Kinner, sowat acht Stück, weer'n rein ut de Tüüt. Ballspelen, versteken, anticken un ok de niemoodsche Frisby-Schiev dorv nich fehlen.

Man nich blots för dat Vergnögen worr sorgt, sonnern ok för de Noot. Wieldat 't in't Huus, nakloor, noch keen "Tant' Meier" geev, güng dat nå den Buschuppen op 't Klo, un Klås weer bannig stolt dorop, dat he so'n gode Campingtoilett praat stellen kunn.

Nu weer dat ok an de Tiet, dat de lütt Petra — see weer 'n Söötsnuut as "Biene Maja" ut 't Feernsehen, un so nenn Klås se ok — vun een Been op dat anner pau'n dä, un to gode letzt mit ehr "Geheemnis" nå sien Fru güng:

"Ik heff all 'n ganze Tiet söcht, man 'n Toilett heff ik nich funnen, ik mutt åvers mål!"
"Du musst mål? Na, denn kååm man mål mit, dat will ik di geern wiesen", antert Klås sien Fru un schoov mit ehr af.

Duer nich lang, un de lütt Deern keem wedder ut 't Hartenhusen ruter. See weer noch ornlich an 't Sorteern vun ehr Kledååsch, as se op de Gesellschaft tokeem un luuthals mit eernste Mien' reep:
"Dor buet ji sik so'n feinet Huus — un hebbt so'n schiet Toilett!"

Klås un sien Fru hebbt noch lange Tiet ehr'n Spååß doröver hatt, un ok hüüt fehlt dütt Vertellen bi keen Tosåmenkåmen.