Dat Theater in Lübeck

Theater

vun Karl-H.Nissen

Anneke weer mit mi in uns Theater. Se kiekt sik geern wat an mit Musik. Ik gah denn mit, aver so ganz is dat mien Welt nich.

Ditmal weer't en Stück up en lütte Bühn un dor hett ok man een Mann wat vertellt vun enen annern Mann. De is up en Schipp up de Welt kamen un sien levenlang dor up bleven. Een un een halve Stunn hett he vertellt.
Man woans he vertellt hett! Mit sien Stimm, dat is klor, man ok mit de Hannen un mit de Ogen. Hett mi bannig goot gefullen.

En Paus geev dat nich. Bevör wi aver rin kunnen in den lütten Saal, stünnen wi buten un hebbt töövt. Dorbi heff ik mi de Lüüd so'n beten ankeken.

Tja, wat sall ik seggen? Wat treckt de Lüüd sik hüüt blots an! Mien Mudder is af un to mit mi in't Theater gahn. Se hett geern Stücken sehn as "Zigeunerbaron" orrer so wat, un ik dörv mit. Wi sünd würklich gahn, en halve Stunn, denn weern wi dor in dat grote, schöne Huus. Mudder harr mi fein rutputzt, Schoh weern blank wienert. Se harr ehr best Kleed antrocken. Theater, dat weer meist as en Fest.

De twee Personen mit Schlips

Dat is hüüt anners. Vun all de Mannslüüd üm uns rum harrn blots twee enen Slips ümbunnen, twee wat öller Herrn, de een harr enen roden üm, de anner enen blagen. Un disse anner, de weer ik. Un sünst? Jeansbüxen, Pullover, dat is normal.

So schick maakt sik junge Mannslüüd bloots, wenn se ok Nissens sünd!

Över de Fruun mag ik gor nich snacken, vun Mode verstah ik nich veel. Wenn ik mal in de Schaufinster kiek, lieden mag ik dor nix vun. Wat ik aver gor nich mag, dat sünd Fruun mit hoge Stevel. De seht mi to energisch ut. Man dat is ok normal.

Up de Trüchfohrt heff ik noch so'n beten snackt vun dat, wat hüüt anners is. Ik weer ut de Tiet rut un sall man nich anfangen mit "fröher weer allens beter", hett Anneke mi seggt, ok so en beten energisch. Dorbi harr se gor keen lange Stevel an.

Man dat will ik doch seggen: In so en Theaterstück gah ik geern wedder mit ehr.