Hunn gehüürn tau mien best Frünn. Ass Dörteihnjöhriger harr ick einen swatten lütten Dackel mit Namen Moni schenkt krägen. Hei bliwwt mi ass ein leiw truger Fünd in Erinnerung.

In dei Nahkriegsjohre upp 'n Dörp gehüürte hei ganz einfach tau uns Familie. Ick trennte mi ook nich von em, as ein US-Soldat inn Mai 1945 mi Schokolaar för em bööt. Hei wier siehr geliehrich un beschützte denn Kinnerwagen, in denn uns Söhn schlääp. Hei lött keinen an denn Wagen ran, ganz sülwstverständlich.

Dei nepalesische Straatenhund slöppt

Dei Wech mank dei Muurn

Nu, ass Dreiunachtichjöhriger, harr ick mit mien Fru dei selten Gelägenheit, Gast bi langjöhrich leiwe däänsche Früünn in Nepal, Kathmandu, tau sien. Tau ehr lütt Huus güng ein schmal Wech, inrahmt von ein Tägelsteinmuur. Hier leech ein Hund un sünnte sick, dicht an dei Muuer presst.

Bloots wenich Zentimeter von em stääkte ein Blechdos' inn Ierdboden.

Mit disse Blechdos' harr datt nu oewer ein besünnere Bewandnis, dei uns höchst Respekt awnöödichte. Poul Erik, uns Gastgääwer, harr denn ruhigen Hund as Fründ wunnen, wiel hei em aw un tau mal ein Leckerli taustääkte un dei Dos' mit Waarer füllte. Dei Hund harr sick dat markt.

Straatenhunnen höört in Kathmandu dortau

An einen Abend kääm hei un sien Fru Anja mit ehr Auto vonne Arbeit nah Huus un — dat is kuum tau glööben — dei Dos' wier leer un dei Hund harr woll Döst. Hei sitt miern inn Wech, vör sick dei Dos'.

Dei Hund an dei Trepp warrt gor nich an dei grote Klock hangt

Upp disse Oort maakte hei dei Minschen upmarksam. Disse, för uns Minschen logisch, Oewerleggung harr ein Straatenhund vulltreckt. Ein einfache ruhich Straatenhund, dei von nümsnich stöört wüür un dei ook sülwst keinen Minschen wat tau Leid' deiht, hett ein selten Klaukheit bewiest!

Uns' Reis' dör Nepal

Sonne Hunn in witt-gelw-bruun un swatt Farw' hebbt wi an vääle Stellen in dei Stadt un woanners inn Lann, upp dei Straat, upp Gehwääch, vör Geschäfte schlaapend seihn, ahn datt dei Lüüd sei wechschuucht harrn, orrer anners stüüren deihn. Sei gehüür'n einfach tau datt Straatenbild, aahn lästich tau sien. Sogoor in dei Anlaach von dei Friedens-Pagood' in Pokhara harr sickt ein Hund in warm Schotter bequem maakt.

Vör dei Fredens-Pagood

In dei Nacht söhlen sei Furrer seuken un, wiel dat kein Straat'nbeleuchtung giwwt, nich ümmer ganz ungefiehrlich sien.

Tschüß!, seggt dei Hund