Seiziing mit 'n Hop On/Hop Off-Bus

vun Behrend Böckmann

„Uns Kinner hemm' mi mit dei Seiziingtour (Sightseeing) 'n grote Freud måkt, taumål ik son'n wunnerboren Panoramablick von båben harr“, vertellt Herta œwerglücklich ehren Korl, as sei wedder ut Elwflorenz nå Hus keem un sei tausåmen an'n Kœkendisch sitten.

„So, so, Seiziing, dat is wull wedder so wat Niemodschet? Œwer wat mutt, dat mutt...“, grummelt Korl in sienen Bort, „œwer is dat allens, wat du twüschen Postplatz un Fruenkark beläwt hest?“

„Ne, dat is noch nich allens, denn disse Seiziing-Bus wier taugliek noch 'n Hop On/ Hop Off Bus“, vertellt sei wieder, un Korl secht blot: „Nu mösst du mi ierst mål verkloren, wat dat is, son'n Seiziingtour mit Panoramblick in'n Hop On/Hop Off-Bus.“

Herta fangt nu an, ehrn Korl allens tau verkloren, wat hei so nich verståhn künn. Sei lecht los: „Mit 'n Bus hest du doch all mål 'n Utfohrt måkt. Un as Jäger hest du oft nauch up 'n Hochsitz seten un rundüm nå't Wild keeken. So is dat ok mit 'n Panoramabus, dat is 'n Hochsitz up Rööd, dat is 'n Doppelstockbus mit Rundblick dörch väl Glas, un wenn man båben tau sitten kümmt, kann 'n œwerall hen kieken. Un wenn dei 'n Stadtrundfohrt mit 'n Frömdenföhrer måkt, denn is dat 'n Seiziingtour.“

Dat lücht Korl in, denn hei besinnt sik nu up einen roden Dubbeldecker, dei em vör nich all tau langer Tiet inne Mœt keem, as hei den Müritzer Borenholt bi Bad Stuer an'n Plauer See besäuken wull.

Œwer mit dat Hop On/Hop Off kann hei sik nich anfrünnen. „Dat mit dat Hop On usw., dat hüürt sik wedder so Inglisch an, as wenn wi dormit uns Språk nich all nauch dörcheinanner bröcht hemm! Gåh mi blot af mit all disse niemodschen Wür.“
Mihr harr Korl nich tau seggen.

„So niemodsch sünd dei Wür gor nich“, säd dunn Herta, „denn dei Inglänner hemm' sik einst plattdüütsche Wür tau eigen måkt, dei wi nu up anner Ort taurüchkriegen. Dat Wurt hop, so heff ik mi dat seggen låten, dat stammt von von uns oll Wurt hopsen af. Weitst noch, woans wi Hopse spält hemm', as wi noch lütt un beinig wiern? Un 'to hop' as Dauwurt hett nu in't Inglische Bedüngungen as hüppen, springen, hoppeln... un 'the hop' as Dingwurt Bedüdungen as Hopser, Sprung, Schwof, Ringelpiez un noch väl anner. Ik wür mål seggen, wi künnen dat mit Fritzing Reuter hollen, dei mål schräben hett, dat 'de Seestadt Rostock (...) de Up- un Dal-Sprung för jeden richtigen Mecklenbörger is'.“

„Un dei Up- un Dål- Sprung?“

„Kiek Korl, dat is so, dei Seiziing-Bus mit den Panoramanutkiek fohrt in Elwflorenz an'n Postplatz los un kümmt bi dei Fruenkark wedder an, höllt ünnerwägens 22 mål un du as Fohrgast kannst sitten blieben un di den Frömdenföhrer anhürn orrer nå Belieben ut- un ok wedder instiegen, sotauseggen up- un dålhüppen, wenn di so is.
Dat geiht den ganzen Dach œwer, alle Viddelstunn kann man up- un dålhüppen, wenn du 'n Billjet vörwiesen kannst.“

„Un wat mœt 'n henleggen, för dissen Up- un Dålsprung Seihziingbus mit Panoramablick?“, will Korl noch weiten.

„20 € kost dat Billjet för 'n Dach un in 'n Grupp, as Rentjäh, as Kind usw. gifft dat 'n lütten Priesnålåt. Ik denk, dat 'n dat utgäben kann. Dor kann man nix tau seggen.“

„Dor hest wull recht, wenn du bedenken deist, dat 'n in männig Wirtschaft för datsülwig Geld blot fief Glös Wåder kriecht.“

Binå is allens klor, œwer Herta will ok dat Allerletzt ehrn Korl verkloren un fröcht em, ob hei ok mit On un Off taurecht kümmt. Œwer Korl meint blot, wenn dei Chinesen „On“ un „Off“ an ehr Apparaten finnen un dei denn in- un utschalten kœnen, denn kann hei dormit ok wat anfangen.

Elwflorenz