Däi Schlach

vun Jürgen Brake

"Einen Augenblick noch, ich bin gleich so weit!"

Däi hiätt mi doch sewwes för Klock tiënn kuommen laoten. Un nu lött häi mi hie staohn as en dummen Jungen, bläërt in siene Papäiers rüm un spiëllt met sien Kuëggelschriewer. Dat deit häi met Fliet! Dat hiätt häi lährt bi "Schickanäiërn för Anfängers". An Duonnersdach lött häi mi Beschäid seggen: "Sie möchten am Montag um 10 Uhr zum Chef kommen." Dao hiät me dann't ganze Wiäckenennne üöwwer Tied naotedenken. Wat mach häi wollen? Hiässe wat verkatt maket? Hiät sick ümmes beklaget? Becke dann? Ek wüss nicks… Odder hiät dat wat met dien Krankfieërn te daun? Hiät owwer doch siene Grünne hatt! Twäimaol Herzinfakt… Odder es et man blous, wieldat häi äis kuort inne Firma es? Villichte well häi allemann inne Afdäilunge kennenlährn? Un ek dann as däi Äiëste? Borümm dat dann? Un warraftech däi Äiëste? Näi, stemmt jao gar nit! Däi Mehlmann, däi em lesten Quartal den grouten Afschlüëtt vermasselt hiät, däi was lesste Wiäke ouk bi iäm. Un däi hiät ächterhiär nicks secht un was ganz stickes…

"Ach, ja, unser Herr Wesdorp… Ja, das musste erst noch erledigt werden. Aber setzten Sie sich doch. Ja, hm, ich habe Sie herbestellt, weil ich mir als neuer Abteilungsleiter mit Prokura natürlich erst einmal einen Überblick…"

Nu kuomm doch endlick tau Potte, du met dien dusseligen Schlips! Middelgries däi ganze Kääl, män däi Schlips, dao küömmet de ganze Äigenheit rut. Wann me ouk süs nicks hiät för de Äigenheit! Däi Schlips, däi es sou bunt, dat häi däi ganzen Brümmers verrückt maken wöüe.

"… Sie als einer unserer besten Mitarbeiter…"

Daofüör hiäs du mi nit kuommen laoten! Daofüör nit! Un daofüör hiäs du mi ouk nit vüör dien Schriewdisch staohn laoten. Dao küömmet noch wat nao!

"… wenigstens in früheren Jahren. In den letzten zwei Jahren jedoch häuften sich die Fehlzeiten…"

Jao, wat kann ek denn daoför, wann däi Pumpe nit mäh metspiëllt!

"Natürlich, dafür habe ich ja auch das allergrößte Verständnis. Ich wäre der letzte, der…"

Daomaols in däi Nacht nao diäm Monnatsabschlüëtt. Däi Piene in diän Ahm, dann inne Buorst…

"… sind ja jetzt wiederhergestellt … und trotzdem … gelegentliche Fehltage…"

…däi Anges, dat dat wiërküömmet … bi't nächste Maol könne et tau late sien, hiät däi Dokter sacht. Un küörter triän un sik nit iärgern, dat hiät häi ouk sacht. Maok dat maol…

"… im Zeitalter der Globalisierung … verschärfter Wettbewerb … Gesetze der Marktwirtschaft …auch und gerade wir im mittleren Management … gestiegene Verantwortung … das große Ganze im Blick haben … auch auf Abteilungsebene … Personalmanagement …"

Ek mau doch föddermaken. Däi Junge well ouk bolle studäiën. Un dat use Petra nu iëhrn Dokter maken kann, dat es doch ne Schangse, da maut me dat Wecht doch bi helpen! Un dat Hus maut noch aftahlt wääen.

"… bekannt für unsere soziale Haltung gerade unseren langjährigen Mitarbeitern gegenüber. Wir lassen niemanden fallen!"

Well häi mi am Enne doch blous bange maken un ek kann nu wiër an miene Arbäit gaohn? Un wat häi mi sacht hiät was blous ne Warnung, dat ek nit mäh krankfiër…

"…waren doch früher ein hervorragender Außendienstmitarbeiter…"

Außendienst! Klinkenputzen! Dat kann ek nit mäh! Dat kann ek nit mäh! Jao, daomals, dao was ek noch jungk un guët terächte!

"…natürlich auch in Ihrem eigenen wohlverstandenen Interesse … größere Freiheit in der Gestaltung Ihrer Arbeitszeit…"

Betahlung op Provisionsbasis! Un däi Inköpers, däi wussen dat. Un wann me däi nicks van däi Provision afgaff, dann gaff et ouk keinen Afschlüëtt. Un keine frië Tied un aowends int Hotelzimmer, blous an däi Wiäkenennen te Huse. Näi, dat kann ek nit mäh! Dao gaoh ek in!

"…ein Mann von Ihren Fähigkeiten … zurück zu den Quellen seines Erfolges … den jungen Hüpfern noch mal so richtig zeigen, was die Alten drauf haben…"

Un aowends int Hotelzimmer un villichte ouk mao int Kinno. En Krimi odder Wildwest. John Wayne. Wat wöüe däi getz daun? Däi wöüe opstaohn un diän unwiesen Kääl bie sien dullen Schlips packen, owwer mit links, un mit rechts wöüe häi iähm en Schlach unner't Kinn giën, dat häi op en Stupp ut däi Schluffen kippen dää.
Nu möchte ek opstaohn un iähm …

"… habe nicht daran gezweifelt, dass ein Mitarbeiter wie Sie die Einsicht in die betriebswirtschaftlichen Notwendigkeiten … und habe Ihre Versetzung in den Außendienst ab nächsten Ersten bereits der Personalabteilung … Sie können es sich noch einmal durch den Kopf gehen lassen. Es sind ja noch zwei Wochen Zeit. Eine Lösung, mit der alle leben können. Die Firma würde nur ungern einen solch erfahrenen Mitarbeiter verlieren…"

Och …, mien Ahm … Ek krië däi Fingers nit tesammen! Keine Fuust …

"Sehen wir Ihrer Entscheidung also mit Interesse entgegen … so oder so … bitte schriftlich …"

Nicks wie rut hier! Mien Ahm! Miene Buorst! Laot di nicks anmiärken. Düör tau! Un nu blous noch büs an mien Schriewdisch. Blous noch oppen Sessel sitten un Luft halen, dann gäiht dat al wiër … Däi paar Schrië, däi wää'ek doch wuoll noch testanne brängen…

"Herr Wesdorp, was ist mit Ihnen?! Mein Gott, wie sehen Sie denn aus? Warum hilft denn keiner? Den Notarzt! Schnell! …"