Größing is väl up Reisen gåhn
un leet nix liggen un nix ståhn,
wiest ganz stolt, wenn's taurüch keem,
wat's in't Logierhus an sik nähm,
wat's sik so as lütte Happen
däd för dei Enkelkinner schnappen,
Såken, dei nich süllen fählen,
wenn's Kopmann un Inköper spälen:

Honnig in'n Plasteschachtel
näben Eier vonne Wachtel,
Semp in ein beschicht lütt Tüt
tau teihn Gramm allerbester Güt,
Bodder in'n kantig Plastikkumm*
Kaffemelk in son'n lütt Runn',
Hoorwasch in ganz lütte Küssen -
nix süll dei lütte Kopmann missen!
Ok Bullenbodder is em Recht,
dei för Veganer gor nich schlecht.

Wat ümmer as Portschon verpackt,
lecht Größing in'n Sammelsack,
un so lannt jeder Zuckerstick
in Größing ehr lütt Sammelfick**,
sülfst 'n Tüt mit ein Gramm Solt
un Tähnprekel*** ut Bäukenholt,
gaut verpackt dei Einmålkamm
un baschen Päper, mannomann!
'n föftel Gramm in'n Päperbreif
is gaut för Mett un för dei Leif,
dei Kauken ok inwickelt blifft,
den't as Bilach taun Kaffe gifft.

Ståhn Spennerboxen up'e Dischen,
deit Größing so, as wull sei fischen,
langt as'n Voss, so bannig schlau,
nich einmål, sonnern mihrmåls tau
un finnt ok hier noch bannig väl
för't Kopmannslådenkinnerspäl.
Bi allerlei Einwech-Klimbim
kümmt't uns Größing ok in'n Sinn,
tau sammeln för dat Kopmannslädchen
Einwech-Kaffe-Ümrührstäbchen.

Wat Größing fünn so sihr bequem,
finnt Brüssel nu up eins nich schön:
Einwechpacken in'n groten Stäl
gifft dat hüt doch väl tau väl,
un so is man in Brüssel bös
up föfteihn Gramm Nutellaglös,
up lütte Kauken, dei man kennt,
luftdicht afpackt, dat Stück söss Cent,
Wust tau vieruntwinnig Gramm,
verpackt so as dei Einwechkamm;
vörbi Größing ehr Bodderglück
as twinnig- un ok teihn-Gramm-Stück!

In't Poppenhuus is allens leer,
denn Brüssel secht: Dat gifft't nich mehr!

Unverpackt, as wi dat kennen,
sall Bodder wedder nåkelt schwemmen
in'n groten Wådergrapen****.
Väl anner Såken hett't ok drapen:
Wittkees tau vierdig Gramm in'n Pott,
Honnig achtuntwinnig Gramm, mien Gott,
ok Semp in'n teihn Gramm Plastikstick
fählt denn bi Größing inne Fick,
afpackt tau twinnig Milliliter Majonäs,
"La vache qui rit"*****, dei Eckenkees,
un noch ganz väle anner Såken,
dei upstunns uns Sorgen måken,
denn't Angebot in Hüll un Füll
bringt tauhop 'n Hümpel Müll.

Denn Gnibbelkråm sall't blot noch gäben,
wo Kranke un dei Ollen läben,
un in'n Wirtschaft sünner Dör,
wo man fohrt mit den Wågen vör,
rullt an't Draif-in******-Schott denn ran,
kiekt sik dor dei Spieskort an
un secht, wenn't denn so dücht:
ik will dat un dat Gericht
mit Majo, Semp, Tomatenschü,
dei Wågen rullt, tatü, tatü...

So'n Verpackens-Överflaut,
secht Brüssel, nee, dat is nich gaud!

So deit Brüssel Größing brüden******,
up ehr Oort deit sei dat düden:
Dei dor båben hemm 'n Tick,
dat licht doch nich an 'n Majostick,
dat dei Lewark nich mihr singt,
uns Minschen keine Freud mihr bringt!

Doch denn däd's mål 'n Utfohrt måken,
beläwt för sei ganz niege Såken,
denn hier un dor an'n Stråtenrand
gifft dat 'n gauden Happenstand,
wo Tüffelsticken******* sünd dei Rönner
mit Mayo ut'n Kauhtittsspenner,
un taun Knackwust gifft dat gau
Semp ut'n anner Soßenkauh,
ut'n drüdden Spenner, süh
kümmt denn noch Tomatenschü********.
Mit son'n lütten Hebeldruck
spennt dei Spenner mit 'n Ruck
'n lütten Klacks von dit un dat,
un Größing denkt: "Dat wier doch wat,
son'n Spenner sünd up jeden Fall
'n gaude Lösung œwerall.
Doch hier un dor wat intausammeln
möt ik nu an'n Någel bammeln!"

* Kumm, Kumme: henkelloser Becher
** Sammelfick: Tasche
*** Tähnprekel: Zahnstocher
**** Wådergrapen: Grapen, dreibeiniges Gefäß
***** "La vache qui rit": frz. Schmelzkäseecken
****** Draif-in: Drive-in
****** brüden: veräppeln
******* Tüffelsticken: Pommes frites
******** Tomatenschü: Ketchup