Dröff dat 'n beten mehr sien?

vun Ursula Vollstedt

Is al 'n poor Johr her, as wi uns bannig opregt hebbt, wiel in bi uns dat Postamt sloten warrn schull.


De niege Poststell in Barmstedt. Foto Ursula Vollstedt

Siet April 2009 gifft dat nu een Poststell bi "Sky". Sietdem geiht uns dat veel beter.

Dat ole Postamt harr över Meddag to. Wenn een nomiddags fief Minuten to fröh keem, müss een in'n Windfang töven, bet de Klock nipp un nau soveel weer, dat se de Döör lossluten müssen.

Nu is uns Post den ganzen Dag open. Vun morgens Klock 8 bet obends Klock 8. Uns geiht dat goot.

Un noch wat: To Winterstiet stellt Sky de Blomen, för de dat buten to koolt is, jüst vör uns Poststell op. Nu is dor ok noch bannig fein dekoreert!

Nülich wull ik en Worensennen afgeven. 1,65 Euro schull ik dorför betohln. De Keerl achter den Schalter froog mi ganz fründlich: "Sie brauchen nicht zufällig 55-Cent-Briefmarken? Wenn Sie diesen Bogen mit 10 Stück kaufen, nehme ich gleich drei davon für Ihre Sendung."

Ik heff mi bannig höögt över em. He kunn smustern, he wull wat verköpen. Dat gifft nich mehr vele Lüüd, de sik so för ehre Arbeit insett. De Geschäftslüüd in uns lüttje Stadt schull'n ehr Personol mol dorop ansetten. Mit Fründlichkeit un Nodenken kann een goot Hannel drieven.


26.2.2012


na baven