Oosteröverraschen

vun Anke Nissen

Gistern haal Peter de Osterkartons vun'n Böhn. In'n Loop vun de Tiet harr sik so allerhand ansammelt, alleen de velen utpuust Eier. Vele dorvun bunt, oft richtig edel bemaalt orrer bekleevt. Dorto all Maren ehr Bast, Holt- un Papier-Bastelkram.

Mit veel Geföhl bröch Peter allens na ünnen. As he graad mal enen wat gröttern Osterkarton in'n Arm up de Böhntrepp na ünnen jongleer — huch! —, dor flitz en lütte Muus ut den Karton rut. Peter verjaag sik, man he bröch dissen Karton seker dal.

Maren sä "Oh!" un nehm em vull Freud in Empfang. In dissen Karton, dor leeg en wunnerhübsch dekoreert Strohkranz. Maren harr em verleden Johr besünners sorgfältig, besünners leevvull inpackt. Dor sull doch nix twei gahn vun de fienen bastelt Blöden un de hübschen Natureier.

Oosterkranz mit Christrosen. Foto Anke Nissen

De Kranz sall dit Johr wedder ehre Wahnung smücken, he sall wedder dat österlich Geföhl anrögen un he sall wedder all Besöker Freud bringen, wenn se jümmers un jümmers vör dissen Kranz staht un wunnerwarkt.

Tja, anstatt dat ik schreev "in dissen Karton leeg en wunnerhübsch dekoreert Strohkranz", harr ik beter schreven: "in dissen Karton hett mal en wunnerhübsch dekoreert Strohkranz legen". As Maren nämlich vull Vörfreud den Deckel hoochböör, dor — ach un weh — totale Verwüstung! Maren starr verbiestert up dat ut'neenfleddert Stroh. Nix mehr vun enen Kranz to sehen, to kennen, to marken.

Nu harr Peter eerstmal sien Doon: Maren müsst trööst warrn, all de annern Kartons wull se nu blots noch mit em tohoop upmaken. Toletzt müß Peter ehr vörsnacken, dat de Karton mit den ehemalig Strohkranz doch wohl entsorgt warrn mütt.

"Kumm man, mien Deern, wi gaht nu rut un smiet den ganzen Kram in de Biotunn un den Karton riet ik twei, de kümmt in den Papiercontainer, un morgen gaht wi mal na enen Osterbasar — mal kieken."

Un dor — as dat zerfleddert Stroh nu ut den Karton raakt wörr, dor fünn Maren miteens en Muusnest — en Muusnest mit twee lütte nakelte Babys...