„Nutella“ as Lockspies?

En Verteller vun Addi Kahl

Wi hebben de leevsten Frünnen op’n Dörp mit grote Gemüüsgoorn, mit Bargen an Appel- un Plummbööm, riesige Rhabarberstauden un wat dat Hart op’n Land allens so begehrt. — De ganze Stolt avers vun mien Frünnen sünd in denn doren Höhnerstall de gackernden Deerten, de uns af un an mit wunnerbore frische Eier un quittengeele Dotter denn Köhlschrank füllt.

"Igitt! En Rott! Dor nerrn! Ik gah nich mehr rünner!"

Nu vertell mien Fründ körtens, dat he ’ne „Rott-op’n-Böön“ in den Stall entdeckt harr un gor nich faststellen kunn, woanns dat dore Deert dor rinkomen weer. He harr allens akraat mit Draht un beten Muurwark dicht maakt — un liekers, de Rott weer jümmers weller maal to sehn.

Un so kööm he för ’t „Rottenfangen“ op de Idee, mit besten Rökerspeck in eene Fall as Lockspies to versöken, as dat ut oole Tieden künnig is: "Mit Speck fangt een Müüs", un Rotten denn ja wiss ok. Avers dat Deert harr ok na Dagen den leckern Köder noch keen beten anröögt!

"Koom, koom, Rottchen! Leckerlecker för di!"

Verwunnert över düssen Misserfolg kreeg he gau an'n Stammdisch in ’n Döörpskroog den plietschen Raatslaag: „Du, sülvst Rotten hebben in moderne Tieden anner Lockspiesen in Sinn un sünd bannig krüüsch wurrn! De Deerten röögt so ’n Rökerspeck nich maal mehr an un sünd hüüttodaags so slau un totaal verwöhnt. Versöök dat eenfach maal mit„Nutella“ , dor sünd de Deerten wohre Lekkersnuuten un totaal naarsch op den söten Smeerkraam, glööv mi dat!“ —
Grote Twiefel? — Schull man dat Rottenfangen villicht allerneegst doch maal mit den Brootopstrich „Nutella“ versöken? — Düsse Raatslaag kööm em jüst een Dag vör den 1. April to Ohren!

Avers „Nutella“ hebben se un wi ok all liekers besorgt, den eten sogoor ok wi so geern as de leckersnutigen Deerten. Kann man düsse verwöhnten Rotten villicht verstahn?! — Ob mien Fründ je mit „Nutella“ to Pott un Spood kommen deit? Noch hett he keen Erfolg vermellt!