Knipp

vun Heinz Tiekötter

Op den Trüchweg vun de Ostsee weer de Autobohn wedder full. Du verleerst langsom den Spooß an dat Autofohrn. Grood noch rechtiedig bün ik in Bargteheid affohrt un denn wieder öber de 404 dörch den Sassenwold. Ik gläuv, dat weer Fügung; so keem ik in Grande bi mienen Schinkenhöker vörbi.

Wat dat in düssen Loden allens an Smackkrom vun Rökerworen, an Wost un Speck un Brotenfleesch geben deiht, dorvun mookst du di keen Bild, wenn du noch nie nich bi em weerst. Ik segg di, du feuhlst di dor as in'n Schlaraffenland.

Normolerwies hett een, wenn he inkeupen deiht, jo 'n Zettel in de Hannen. Hier bruukst du sowat nich. Du löpst an de Regolen lang un dat gifft nix, wat een nich geern inpackt harr. Ik mutt mi jümmers tosomenrieten.

As mien Korf full weer un dat in Keulschapp to eng warden kunn, dor full mi een grotet Stück Lebberwost in de Hann. So'n Stück, wo du een Woch mit to dohn hest. Dat kunn ik woll noch ünnerbringen.

An'n neegsten Morgen harr ik to'n Freuhstück Swattbrood mit Lebberwost op'n Disch. De Lebberwost hett nich smeckt. Sowat harr ik noch nienich, dat mi Lebberwost nich smecken deiht! Ok mit scharpen Semp gung dat nich. Dübel ok, wat harr ik dor förn Schiet mitnohmen.

Ik weer grod dorbi, de Wost ut den Plastikbeker to kleien, as mien Blick op dat Etikett full — un denn lees ik blots een Wort: "Knipp"! Un denn wüss ik, dat ik gorkeen Lebberwost in de Hannen holl. Ik harr Knipp inpackt!

As ik mit dat Freuhstück fardig weer, heff foorts Pellkantüffel opsett. To'n Meddag ward dat griese Grützwost geben. In Bremen seggt se Pinkel dorto. Knipp mit Zippeln in de Pann, dat ward broten, bit dat bruun is, un denn droffst du mi giern tokieken. Man afgeben warr ik nix dorvun! Dat is nämlich 'n Eten för fiene Lüüd. Dorto gifft dat denn een grotet Beer un een Hamborger Kümmel.

Wenn ik doran dink, denn löppt mi nu all wedder dat Woter in'n Muul tosomen.