In verläden Tieden wür dei ierste Schnitt inne Wischen tau Heu måkt. Runkelräuben un Wruken krägen dei Rundhack; wenn't gaut güng, geef dat üm den 14. Heumånd twors kein Rückbesinnung up dei Störmung vonne Bastille, œwer dei iersten niegen Tüffeln würn rackt un as Pelltüffeln mit 'n Solten Hiring un Speckstipp up'n Disch bröcht. Un wenn't Wäder dornå wier, künn dei Buer inne letzt Dekad' Gasten hocken un Roggen anmeihn un so up dei Aust taustüern.

Gassen. Bild Rudi Witzke

In Heumånd harrn uns Vöröllern nicks tau fieern, denn Ornbier orrer Austköst geef dat ierst, wenn dat Kuurn in't Fack leech. Ut jeden Dach 'n Fieerdach orrer 'n Akschonsdach tau måken, dat is 'n niemodsche Såk. Hemm' uns Vöröllern noch den Geburtsdach von Kaiser un por anner Dåch fieert, so gifft dat hüt för jeden Dach in jeden Månd 'n Grund taun fieern.

Nähmen wi uns por Dåch in'n Heumånd vör un fangen mit den 1. Heumånd as den Internatschonalen Döntjes-Dach an. In't Johr 1994 keem Wayne Reinagel (Johrgang 1961) as Amerikan'scher Schriewersmann un Teikenkünstler von nich ganz wohre Geschichten up den Infall, dissen Dach taun Döntjes- un Schnurrendach tau måken — un dat man dissen Dach fieern künn, wenn man anner Lüd Döntjes orrer Schnurren so vertellt, dat's düchtig schmüstern orrer ludhals lachen möten. As Bispill sall disse Schnurr gellen: Sitt 'n Rentnerpor up'n Bänk un kiekt in'n Gorn. Up eins secht sei tau em: "Mi jökt dei Hand, ik glöw, wir kriegen mihr Rent." Dunn secht hei tau ehr: "Un mi jökt dei Hinnelsten un ik glöw, dei schieten uns wat!"

Antonio Tantardini (1829-1879), Faust e Margherita.
Bild Paolobon140/Wikimedia Commons

Schmüüstern möt 'n ok, wenn man hürt, dat dat af 1990 den Internatschonalen Dach von'n Säuten gifft. Doch dei kümmt nu nich ut Amerika, sonnern ut't Vereinte Königriek un ward dor af Midde dei 90er Johren fieert. Dormit is all klor, dat sik dat nich üm dei Küsserie von Erich un Leonid hanneln deit, sonnern üm den Säuten, denn dei Mudder ehr Kinner updrückt orrer dei ut Leif un Fründschaft utdeilt ward. Dat hett ok Tieden gäben, wo dat Updrücken von'n Säuten up'e Stråt nich sittlich wier un ünner Ümstänn' sogor ünner Stråf stünn. Hüt is dat anners. Florian Sülweriesen hett 2011 in sien "Winterfest vonne Volksmusik" in ein Minute 117 Frugenslüd 'n Säuten gäben un Sophia Severin un ehr Partner James Belshaw hemm' dat 2005 von'n 6. bet 7. Heumånd 31 Stunden, 30 Minuten und 30 Sekunden uthollen, nich voneinanner tau låten — un würn mit dissen Rekord in't Guinness-Bauk upnåhmen. 2013 hett dat thailännisch Por Ekkachai un Laksana Tiranarat dissen Rekord broken un sik 58 Stunnen, 35 Minuten und 58 Sekunnen Säute updrückt. Blifft noch antaumarken, dat einer, dei dei Säuten giern un oft utdeilt, weniger Uprägung kennt, nich von Bang dräben ward un ünner Ümstänn' fief Johr länger läben deit.

Dei 14. Heumånd is dei franzöös'sche Natschonalfierdach, dor an dissen Dach 1789 mit den Storm up dei Bastille dei franzöös'sche Revolutschon anfüng. Dei Devis' wier "Liberté, Égalité, Fraternité" (Frieheit, Gliekheit un Bräuderlichkeit), un dei hett bet hüt nich an Bedüdung verlurn. In Amerika is disse Dach ok dei Dach von't Nåkelktsien. Man sall nåkelt in sien Wohnung rümmerlopen un dat Gefäuhl beläben, dat Nåkeltsien 'n wunnerbore Såk is.

In Düütschland sünd wi all bäten wieder. So geef dat all 2017 up'e Reeperbåhn dei Nackt-Show "Adam sucht Eva", in Erfurt süll mål 'n Fleiger mit nåkelt Gäst an Burd nå Stockholm fleigen (dor hemm' sik œwer nich nauch funnen), dor jågen nåkelt Minschen Willschwien in'n Stadtpark, in'n Harz gifft dat Wannerungen in Wannerschauh für ansünsten nåkelt Lüüd, dat gifft nåkelt golfen, nåkelt Tweiråd fohrn un nåkelt up Safari gåhn. Un nåkelt wat beläben ward nå un nå taun Geschäft un dat sall tau Tiet näben dei Frünn' an'n FKK-Strand so üm dei 10 Milljonen Minschen gäben, dei för 'n nåkelt Beläwnis giern väl Geld utgäben: In Südafrika kann man so as dei iersten Minschen nåkelt an'n Wåderlock sitten un Zebras un Antilopen upluern orrer mit Haut un Schauh un Sünnenöl, œwer süss nåkelt mit 'n nåkelten Ränscher (Ranger) den Busch dörchströpen. Up'e Fidschi-Inseln kann'n nåkelt dükern, in Kanada nåkelt 'n Sprung an'n dicket Gummiband måken (Bungee-Jumping). Up männig grot Schäp gifft dat 'n FKK-Deck, un anner ankern dor, wo nåkelt baden mœglich is. Inne Karibik gifft dat FKK-Krüzfohrten, wo't blot wägen dei Hygiene nich nåkelt tau Disch geiht. Dat gifft Sägeltörns för Nackedeis un FKK-Sportresorts as dat in'n franzöös'schen Urt La Jenny, wo dei Nåkelten ünner sik sünd, sik so nich ünner Beobachtung fäuhlen, un bi't Inköpen, Golfen, Bogenscheiten un Volleyballspälen, tau Faut un up't Rad, bi Dach un Nacht ehr nåkelt Welt utläben. Un dat gifft dei Bewägung "Glieke Bost för all", dei sik dorför insetten deit, dat sik Frugenslüd äbenso as Mannslüd mit 'n nåkelt Bost an'n Strand, in'n Laden orrer up Stråten bewägen dörpen. Solang nich Bost gliek Bost is, gellt för dei FKK-Jünger dei Devis "No Nipple is free until all Nipples are free!" (Kein Bostwratt is frie, bet all Bostwratten frie sünd). Solang dat uns Demokratie in Frieheit hergifft, warden dei Nudisten dat nich upgäben, mål as ihrbore un sülfstverwürklicht Frakschon nåkelt in'n Bundsdach intautrecken.

Drei anner lustig Dåch willen wi noch anmarken: an'n 16.Heumånd ward dei internatschonale Adder- un Schnåckendach (Schlangentag) fieert, un US-Amerika fieert an'n 22. Heumånd den natschonalen Dach vonne Hängematt (National Hammock Day) un besinnt sik up den Bruk vonne Urinwåhner, dei nu inne warme Sommertiet nie beläwt warden sall. Un af 1991 gifft dat an jeden drüdden Mittwoch in'n Heumånd den amerikan'schen "Hot-Dog-Dach", wo dat Wettäten von Würstchen taun Vergnäugen ward.

Internaschonale Hängemattendach? Is bi mi jeden Dach!