Hopp, hopp!

vun Silke Frakstein


Hopp, hopp, hopp — de Tiet, de löppt.

Nu hebbt wi al Februar. Un veele denkt an de föfte Johrstiet.
Kümmt nu noch Snee un Küll? In Hamborg is dat to warm, seggt de Fachlüüd. De Sneekieker sünd all buten. De Geus treckt vun’n Osten no’n Süden. Un de Piepmätze in’n Goorn singt luuthals.

Ik bün ok dörchenanner. Mutt ik nu Fröhjohrsputz moken? Allens in de Sünn, waschen, kloppen? Heff kaputte Fingernogels, ober ….. find villicht den tweeten Ringelsocken?

Ik bläder lever in’n Klenner vun 2019 un lot nochmol allens an mi vörbi lopen. Mann, wo oft weern mien Fründin un ik in’t Theoter! Mennigmool heff ik ok in’n Klenner schreben, wat wi eeten hebbt. Süh, nu heff ik glieks de Menüvörslääg för 2020!

Un in Schwerin weern wi, un Fontane hebbt wi besöcht un in Budweis hebbt wi to Wiehnacht Beer drunken. Un en ganz basige Wiehnachtskripp hebbt wi in Hradec beleevt. De Strumpmakermeister Kryza hett in 60 Johren dat Wunnerwark tostannen bröcht. 1398 Menschen, dorvon 133 bewegliche Figuren. — Dat weer wat för de Bröder Braun vun de Modelliesenbohn!

Ach, un noch veele, veele annere scheune Soken. Allens an Kummer un Sorgen schuuvt wi eenfach bisiet.

So warr ik dat ok mit de Vörhersagen för 2020 moken: Velorouten, Klimawandel, in jeedeen Stadtdeel 800 bit 1000 niege Wohnungen.
Ik köff mi lever nu twee Rundstücke — mit’n Bon to’n Wegsmieten — un to eeten gifft dat Frikandellen mit Salat.

Un: Rosen, Tulpen un Narzissen……. dat kümmt nu inne Wohnstuuv.


9.2.2020


na baven