Hochtietsmoden

vun Behrend Böckmann


Gaut bekannt, doch lang nich seihn,
is't nu disser Dåch gescheihn,
dat Frieda tau den Stadtbus geiht,
wo all Fründin Elfi steiht,
un œwer väle Haltestellen
warden beide nu vertellen
nå dat Muster "Hest all hürt?"
un wat sei so an anner stürt,
von ein Krüzfohrt un nich minner
von Kinner un von Kinneskinner,
von dit un dat up disse Welt,
bet Reklame sei upföllt:
'n Messe för dat Hochtietsfest
mit Modenschau von't Allerbest.

Un Frieda furts tau Elfi secht:
"Son'n Hochtietsmess', dei is nich schlecht,
Ik kenn ok weck, dei wiern all dor,
denn disse Mess' gifft't jedet Johr."

"Dat wür mi bannig int'resssieren,
denn bi uns künn't bald passieren,
dat dit Fest in't Hus uns steiht,
denn soväl, as ik wull weit",
secht Elfie Frieda lies in't Uhr,
dunn höllt dei Bus: Gleviner Dur,
un noch lieser tuschelt's blot,
"dat Fest, dat Fest ward riesengrot!"

Un as dei Bus denn Fohrt upnimmt,
dei Inlådung nå Linstow kümmt,
ja, nå Linstow sall dat gåhn
bi Krakow anne Autobåhn!
Un Elfi krüppt noch dichter ran,
dat Frieda dat kum hüren kann,
"Ik denk, ik denk, du weitst ja all
siet Korten gifft't dei "Eh för all",
un uns Döchting, ik sech di't nu,
ward sik verfriegen mit ein Fru."

"Ok dorup hett dei Modewelt
sik all bi Tieden gaut instellt."
Un as Elfie dat so secht,
wunnert Frieda gor nich schlecht,
dat ehr leiwe Nåwersch weit,
wat denn "Eh för all" hüt heit.

Elfie vertellt nu von allein,
wat sei harr in't Kiekschapp seihn:
"Up son'n Feschenwuik* in Wien
un nülichs denn ok in Berlin,
seech ik, dau ik mi recht besinnen,
för Brutlüd fiene "Gender"-Plünnen,
för'n Brüjam rode Hochtietsschauh,
dei blot den Papst einst keemen tau,
wat man hüt antrecken klann,
wenn Fru mit Fru un Mann mit Mann,
wenn dei Brut emanzipiert
in'n Schniepelrock ganz stolt spaziert,
un dei Brüjam måkt dat mit
in'n Extra-Kleid för em in witt."

"So, so", föllt Frieda ehr in't Wurt,
"denn is Linstow doch dei Urt,
wo dat künn Anrägung gäben
för dat schönste Fest in't Läben!"

Dunn höll dei Bus, Frieda möst rut
un mit dat Schnaddern wier't nu ut!

*Fashion-Week


11.9.2022


na baven