Dat Hillige. Bild: Ludgerd Lüske. Klick up tau'n Vergröttern!

Gospel

vun Anke Nissen

Uns Söhn hett uns inlaadt to en Gospel-Konzert. Natürlich wüß ik so in etwa, wat en Gospel is. Gospelmusik ist christlich, afro-amerikaansch Musik un warrt mehrst vun farvig Lüüd sungen, se singt vun Jesus, se singt luut un se singt schöön.

Mien leef Mann hett mi denn noch verkloort, dat Wort Gospel bedüüdt Evangelium, "Gode Naricht". Un he vertell mi ok, das "Gospel" nich de Sound — also de Klang — meent, nee, dat is de Bott — de Botschaft. Wenn sik dat in dat Leed üm Christus hanneln deit, denn is dat en Gospel.

Un jüst so weer't ok in dat Konzert, to dat uns Jung uns inlaadt harr. Wi marken bald, wi weern mit Afstand de öllsten Tohörers. Man begeistert hebbt uns de Sänger bannig. Ok wi sünd upstahn — een kunn bi de Musik nich still sitten. Ok wi hebbt klatscht un bi männich Leed düchtig mitsungen.

De Sänger hebbt vertellt, dat ehre Lüüd in fröher Tieden nich lesen kunnen, nich schrieven, se dörven dat gor nich lehrn — man singen, dat dörven se, un so hebbt se sungen, hebbt sik so de "Gode Naricht" wiedergeven. So entstünnen de "Spirituals". Dat sünd Leder mit religiöös Inhalt, de vertellen vun dat Sklavenleven in Amerika. De sünd bekannt siet dat 17. Johrhunnert. Und de Spirituals sünd de Wörtel — de Uursprung — för de Gospels.

Süh, un to so en Gospel-Konzert hett uns Jung uns nu inlaadt.


Gospelsängersche

Blots fröhliche farvig Lüüd stünnen up de Bühn. Jeder enkelte harr en Stimm, dor kunn dat Jüngst Gericht mit upweckt warrn. Un ehr Singen röögte ganz binnen in mi wat an. Se süngen luut un se süngen schöön. Vele Songs heff sogoor ik kennt, as "Go tell it on the mountains" orrer "O happy day" orrer "Down by the riverside".

Un an'n End vun 't Konzert harrn all Lüüd fröhlich Gesichter, all Ogen strahlen, all weern se goot togangen. En Freud, dat mit to beleven.

Sungen hett de "The Very Best of Black Gospel" Chor in't Kolosseum to Lübeck.


15.1.2012


na baven