Koffidrinken mit Gerda

vun Silke Frakstein

Veele Johren harr ik enen Plattdüütsch-Kurs bi de VHS Quickborn. In dat Gemeendehuus in Hasloh harrn wi unsen Ünnerricht. So twüschen 10 un 12 Lüüd weern wi, ut Hasloh un ümto. De Ünnerricht weer an'n Vörmiddag un sodennig weer dat Öller sotoseggen "een Grufti-Kurs".

Ober Spooß harrn wi, veel Freid — un lehrt hebbt wi notürlich ok wat.

In de 14 Johren de wi tosomen weern hebbt wi nich blots in de School seten, nee, 80 Mol hebbt wi feine Utfohrten mookt. Un een CD hebbt wi ok mookt. Mehrstendeels weern de Schietbüdels bi de Utfohrt dorbi un denn mit 20 Lüüd in Bus orrer Bohn. Buurntheoter live. Op'n Bohnstieg to'n Bispill jümmers to tweet, so as de Kinner, wenn se ünnerwegens weern. Ik vörnweg mit'n roden Schirm. Mann, wat weer dat för'n Spooß!

Gerda und Heinrich weern de Öllsten. Ehr Leben weer Arbeit. Heinrich op'n Buernhoff un Gerda mit'n Siedlungshuus un'n groten Goorn. Dree Kinner harr Gerda, un wenn se Geboortsdag harr, dennso harr se fix to doon. Se weer de Mittelpunkt un ut alle Ecken vun de Welt weern se bi Oma to'n Geboortsdag, orrer an Wiehnachten. "Nee, nee, för Platt dor heff ik düsse Week keen Tiet," seggt se denn.

Weer se denn wedder dor, hett se en niege Geschicht mitbröcht. Allens fein mit de Schrievmaschien (manuell!) schreben.

Se weer bi de Chronik vun Hasloh dorbi. Hett för ehren Mann, de ut Ostpreußen keem, recherchiert. En Drepen vun de Lüüd ut dat Heimatdörp vun ehren Mann arrangiert un en Book dorvun schreben. Ehr Goorn weer eenfach wunnerbor. Un wenn de Enkelkinner kemen, weer groten Insatz in de Köök.
Un dat allens mit Fohrrad.

Wenn uns Krink ünnerwegens weer, dennso weer se in de letzte Tiet nich mehr veel dorbi. Nee, dat is allens veel to anstrengend un mit dat Eten harr se ok so ehr Probleme. Fleesch wull se nich un Steakkartoffeln mit Quark, dat weer ehr to matschig un dat haar so ok to Huus. Un de Torten kunn se beter. — Weer ok wohr. Ehre Torten weern en Droom un keen Diät!! Ik weer oft bi ehr un wi hebbt in den wunnerscheunen Goorn seten mit Koffi un dicke Torten.

2014 weer Sluss mit den Kurs. Gerda is al fröher utstegen un weer nu ganz mit de Heimatgeschicht vun Hasloh togangen. Ik heff ehr ut de Ogen verloren — un nu, dörch Corona, wedderfunnen.

So as veele veele annere Lüüd ok, hebbt wi in Kisten, Kasten, Keller klor Schipp mookt. Ik heff enen dicken Ordner vun Gerda funnen. Ehr heelet Leben leeg wedder vör mi.

Ik heff ehren Söhn anpingelt un wi hebbt lang över sien leve Mudder snackt.
Se liggt al lange Tiet ünner de Eer. In'n Oktober, as mol wedder de ganze Fomilie tosomen weer, üm allens för Wiehnacht to bespreken, hett Gerda sik in'n Sessel sett un seggt: "Mi is so'n beten swiemelig." Un bi düsse Wöör is se ut de Welt gohn.

Se liggt anonym, wiel de ganze Fomilie op de ganze Welt to Huus is.

Pingsten harr se Geburtsdag un dor heff ik Koffi un Koken mit op'n Karkhoff nohmen un mit Gerda Koffi drunken.

So as freuher.