Faken bin ick ünnerwegen
ohne eenen Schlips to dregen.
Ick weet mi nich torechttofinnen
den Schlips so richtig binnen to künnen.
So'n Schlips sitt grade oder schräg.
Jüstso is dat mit'n Fleeg.
Beter is, de Fleeg sitt quer,
denn wiest se 'n beten mehr so her.

Ick heff so'n Schlips mol ümbinnen wullt,
bloß har man keenen — sülben schuld.
Ick har den Dag jüst mienen
vun de Reinigung nich kregen,
un mien Naber wör mit sienen
jüst mol sülben ünnerwegen.

So'n Kulturstrick,
meent man, de makt schick,
aber bringt nich jümmer Glück.
Manche Mode jedenfalls
hängt mi langsam ut'n Hals.
So'n Schlips an Hals is nich verkehrt,
de hett sick uck all lang bewährt.
In Summer is dat faken hitt,
denn nehm ick em so geern nich mit.
För'n Winter müch ick een ut Wull,
denn is de Küll nich ganz so dull.
Gifft uck sünst Gelegenheit,
wo man em geern mol drägen deit.

Gifft Stellen, dor is man nich komplett,
wenn man keenen Schlips üm hett.
Froonslüer gaht dor hin in lang,
för Kerls is dor Krawattenzwang.
Den Schlips as schmalen Vörhang,
den brukt man bi so'n Vörgang.

Dat is noch gornich lange her,
dor wör ick mol up so een Stäer.
Wi hebbt dor to'n Eten beten säten.
Miene Fro hett mi bemeckert,
ick har mienen Schlips bekleckert,
weswegen ick bedrüppelt sä,
dat mi dat richtig leed doon dä:
"Ick seh woll ut as wie so'n Schwien."
Dor meen een anner Fro to mien,
ick harr deswegen doch nich jüsst
mi extra noch bekleckern müsst! —
Wiel man dat uck noch knipst hett,
föhl ick mi up'n Schlips pett.

So'n jungen Mann har mol'n Deern,
de müch he woll ganz geern.
De Deern, de wör in Globen,
se wulln sick bald verloben.
He aber güng noch geern mol ut,
alleen so, ohne siene Brut.
Eenmol wör dat mol de Fall;
he güng ohne ehr na'n Ball.
Dat wör denn all ne Tietlang her,
dor wüss he dat all gor nich mehr,
as siene Brust so'n Foto fünn,
wo he so in Gesellschaff stünn
mit ne anner Deern in Arm.
Dorüm möök siene Brut Alarm.
He sä bloß: "Wat man dor so süht,
dat is noch ut fröher Tiet,
do hebbt wi beid us noch nich kennt.
De Geschicht is lang to End."
Se sä: "Du glöövst, ick heff keen Grips?
De Wohrheit kenn ick an dien Schlips.
De Schlips, de an dien Hals dor hängt,
den heff ick di nämlich schenkt!"

Nu har se em an Schlips to faten.
He schull in Tokunft sowat laten.
Se har den Ünnerscheed nu lehrt
vun son Schlips un Hunnensteert.
De Hunnensteert, de hett den Zweck,
dat he dat Moorsgesicht verdeckt.