Passion 2024
Oculi

vun Marlou Lessing

Rembrandt: Dree Bööm (1643)

Dat Buernjohr fangt an. "Im Märzen der Bauer..." — hüüt geiht dat al fröher los. Veel swore Arbeit liggt vör de Minschen. Dat Weder is noch gries, de Winter weer natt, du weetst nich, wat kümmt. Deep Lucht halen.

Wokeen de Hand an de Ploog leggt un kiekt trüch, de döcht nich för Gotts Riek.

Lukas 9, Vers 63
Wekensprook för de Week na Oculi 2024

As eerst hebbt de Buern den Entscheid drapen: Wat will ik düt Johr anbuun, wat schall ik sein? Wenn de Saat in'n Bodden is, kannst nix mehr an dreihn, denn muttst op Gott vertruun. Keen Rückgängigmaken, keen Korrektur, keen "Och harr ik doch...!" De Buern hebbt ut de Vergangenheit lehrt, dat is wohr; se hebbt ehr Künn ut ehr Erfohren mit de Natuur. Avers op ehrn Weg hülpt ehr bloots de Blick na vörn — un dat Vertruun, dat de Aarn kamen warrt. Dat de grönen un later de güllen Halms in'n Wind weihn warrt, beladen mit Nohren.

Foto Antje Heßler

Düt Vertruun is, as jedeen Vertruun, Gottvertruun.

Un dat Vertruun helpt, dat sik dat erfüllt.

Wo veel vun düt Gottvertruun hett wohl Jesus op sienen Weg bruukt? Keen Rückgängigmaken, keen Korrektur, keen "Och harr ik doch...!" He müss na vörn kieken — dör den Dood dörch, direkt in Gotts Riek.