Passion 2020:
Sünndag Oculi — Bußgebett in Twiefel un Wedderpart



 

Psalm 6
Bußgebett in Twiefel un Wedderpart

Een Psalm Davids, vortosingen bi't
Sietenspill op acht Sieten.

Ach, HErr, straaf mi nich in dien Brass
un slaa mi nich in dien Grull.
HErr, büs mi goot to, denn ik bün süük,
maak mi heel, HErr, all miene Knoken sünd verfehrt
un mien Seel is heel un deel verschreckt.
Ach du HErr, wo lang!
Dreih di, HErr, un rett mien Seel,
help mi um dien'n Hochsinn willen.
Denn in'n Dood denkt nümmsnich
an di, keen will di bi de Doden priesen?
Ik bün so mööd von dat Klagen;
elkeen Nacht is mien Slaapsteed natt
un miene Tranen loopt op mien Puuch.
Mien Oog is drööv worrn vor Kummer
un dämstrig, wieldat miene Bedrückers so veel sünd.
Weg met jo, all ji Plaagminschen;
denn de HErr hört mien Wenen,
mien Gebett nimmt de HErr an.
Et mööt all miene Weddersakers
toschannen warrn un sik verfehrn;
se mööt ut'n Weg un at'n Blix
sünd se nich mehr.

Psalm 8
Een Psalm Davids, vortosingen, op de Gittith.

De HErr, use Böverste, wo wunnerbar
is dien Naam op use Welt, de du diene Macht
an'n Heven tekenst!
Ut Kinner un Wickelkinner ehr Munnen
hest du eene Gewolt toricht
von wegen diene Fiende,
dat du utdelgst de Wedderdenkschen
un den Fiend.
Kiek ik in den Heven, dat Wark von dien Hannen,
den Maand un de Steerns, de du maakt hest:
Wat is doch de Minsch,
dat du an em todenkst,
un de Kinner von de Minschen,
at du to jem steihst?
Du hest em een Spier minner maakt
at Gott, uprichtig un schöön
hest du em beschickt un em een Kroon upsett,
du hest em to'n Uppasser maakt
över dat Wark von dien Hannen,
allns hest du unner siene Fööt doon:
Schaap un Rinner all, dorto ok
de willen Deerten,
de Vagels unner dat Hevengewölv
un de Fischen in de Meren
un allns, wat dör de Meren hendörchtücht.
HErr, use Regeer, groot un wunnerbor
is dien Naam in alle Lanne.


Platt: Adeline Erika Decker

15.3.2020


na baven