Wenn de Minsch Gott speelt

vun Rudi Witzke


De Middlere Osten un Nordafrika brennt!


Bild: Rudi Witzke

Kannst lesen: Tripolis brennt. In Kairo weern de Lüüd up de Straten. In Yemen un Bahrein, in Algerien un Jordanien un annerwo willt de Mischen Frieheit, miehr Rechte, ehr Leven sülfst bestimmen. Wohl över dusend Demonstranten hebbt ehr Leven verlorn. In'n Middleren Osten un Norden vun Afrika brennt dat. Nüms weit, wohen dat Füür överslaan kann.


Dat brennt..... Bild: Kotasik/Wikimedia commons

Ok in de kamende Nacht warden junge Lüüd versöken, up veel to lütte Scheep vun Tunis na Lampedusa in Italien orrer na anner Insel ut Afrika aftohauen. Vele kaamt an, vele versuupt in dat kole Wader vun't Middelmeer.


Up de Flucht. Bild: Vito Manzari/Wikimedia Commons


En groot Schipp reddt... Bild: Department of Navy/Wikimedia Commons

Kann ok angahn, dat grötter Scheep de Minschen ut de Nöötschalen redden. Un wo veel vun uns seggt denn: Na uns schallt se aver nich kamen, wi hebbt all naug Emigranten, Asylanten! De Minschen mit Migrationshinnergrund sünd ja bi uns nu bald föfftig Perzent!

10 Kilo Weiten levern Benzin för 100 Kilometer mit een Middelklassauto. Orrer weeren dat 22 Kilo? Nu wiesten se uns letzt Minschen up en Markt in'n Middleren Osten, de sik keen Handvull Bohnen köpen kunnen för sik un de Familje.


Keen Handvull Bohnen för mien Lüüd?
Foto Inge Witzke

Dor demonstreert na 30 un miehr Johr de Lüüd un willt de Diktatoren ut ehr Land jågen. Bi dit Demonstreern blifft keen Tiet för de Feller, de villicht wat to eten levern wöörn. De Wirtschaft breekt tosamen. De Taukunft vun disse Länner is nich seker. Hunger kümmt to den Groten Hunger un de groot Dröögde in Afrika dortau.


Dat Volk steiht up. Bild: Ramy Raoof/Wikinews

Ik will mi sülven noch maal kuntulleern un wat vun de Rieken un de Armen vertellen un mi an de Boost slaan un fragen, wat dat naug is, wat wi elkeen Maand na Nicaragua as lütte Hülp an een arme Familje schickt. Mütt wi verdubbeln? Meist wi all? Elkeen na sien Wahl!

Wenn de Minsch Gott speelt

Hunger un Afrika, dat weit elkeen vun uns un will in Rauh laten warden mit Utrieter, Flüchtlinge, Emigranten heiten de woll. De sett ehr Leven up't Spill üm na een riekes EU-Land to kamen. Wi hebbt doch ok arme Kinner un Hartz-IV. Weitst aver ok, dat de Hitt un verdrögte Mais in anner Deile vun uns Welt de Minschen in Noot bringt?


Alleen mit de Dürre: Massai-Mann. Bild: Wikimedia Commons

Kannst seggen: Dat ehr Mais verbrennt un Fröögnis över't Land kümmt, dorför köönt wi doch nich. Wi bruukt unsen Mais sülfst. Da ehr Veih keen Gras miehr finndt, dat is nu maal so.
Ik segg: Hülp is nöödig, de Middlere Osten brennt lichterloh. De Welt kann ut de Fugen geråden — un in dat wille Dörcheenanner pultern wi middenrin.


Keen Gras wiet un siet för dat Veih vun de Masai. Bild: Hajotthu/Wikimedia Commons


Hunger, Verhungern, Doot! Bild: Dr.Lyle Conrad/Wikimedia Commons

Gah mi loos! Wi hebbt Sorgen naug, wi mütt Benzin un Diesel un Strom ut anner Borns hålen: Wi mütt mit BIO dat maken. Dor bruukt wi jümmer miehr Mais.


Maisfeld för Biogas? Bild: 3268zauber/Wikimedia Commons

Un wenn de nich reikt, so nehmt wi ok Raps. Wat wi dormit maakt? Ne, allens köönt wi nich upeten. Wi köönt dorvun Schmeerfett, Diesel un Benzin maken. Jawoll!


Foto: ML

Ok Weiten für Biobenzin?


Weitenfeld. Bild: 3268zauber/Wikimedia Commons


Bild: Hinrich/Wikimedia Commons

Un wenn wi denn noch nich naug Diesel orrer Benzin hebbt, denn nehmt wi ok Weiten. Dat wöör bi juuch Leven redden, wenn ji ut den Weiten Mehl-Flåden backt? Ik kann dat nicht uthollen , an een Liter Benzin ut Weiten för dat Auto un de verhungern Minschen togliek natodenken. Ik bün doch nich de leve Gott! Dat, wat wi maakt, dat is een groot Sünn? Aver wat willst maken? Dat Auto bruukt wi nu maal, un Söhn un Dochter bruukt ok een lüttes. Wi schallt de süss to ehr Arbeid henkamen. Un de Autos föhrt nu maal mit Benzin orrer Dieselöl.
Un so geiht dat:


Biogasanlaag. Foto: ML


Foto: ML

De Buurn sluten sik tosamen. In grote Törms gäärt se den Mais, den Raps un ok den Weiten. Mit Destillaatschoons-Törm köönt se denn Schmeerfett, Dieselöl un Benzin måken. Wenn een denn noch een lüttes Elektrizitäätswark dortau buut, denn kann hei Strom an de Stromkaptalisten vun e.on orrer Vattenfall verköpen. Wi hebbt in Sleswig-Holstein al so veel Privaatsroom, dat wi niee Hochspannungsleitungen buun mütt. De Buurn willn aver ehr Land nich för de hogen Masten hergeven. Denn ward se even "enteignet".

Worüm de Armen deinen?

"De Frömden schallst du nich tosetten un trurig maken. Wieldat ji ok Frömde in Ägyptenland west sünd. Ji schallt de Wittfruun un Münnel nich pieren. Wenn du se pierst un de warden to mi schriegen, so waar ik ehr Schriegen mitkriegen. Denn warr ik in Rååsch kamen, dat ik juuch mit dat Sweert ümbringen un juuch Fruuns to Wittfruun maken un juuch Kinner Münnel warden. Wenn du een ut mien Volk Geld uthelpen deist, een Plunnerigen, so schallst du nich as een Wokerer hanneln, du schallst kein Penn Tins vun ehm nehmen. Wenn du vun dienen Negsten den Mantel as Pand nümmst, schallst du ehm trüüch geven, ehrder de Sünn ünnergeiht, denn de Mantel is sien eenzig Taudeck för sienen Lief. Woans schall hei süss slapen? Ward hei aver schriegen to mi, so warr ik dat fuurts wies warrn, wieldat ik gnädig bün."

So steiht dat schreven bi Mose 2. 22,20-26.


Minsch un Victoriaboors. Bild: smudger888/Wikimedia Commons

"Wehe de, de wat anners daut, de ehr Macht missbruken, dat se Anwiesen un "Erlasse" rutgeven un Minschen in't Unglück störten! Se bringen de Plunnerigen un Swaken in mien Volk üm ehr Recht un plünnern de Wittfruuns un Münnel ut. De Dag vun't Gericht kümmt wiss un dat Unwedder vun dor achtern an de Kimm kümmt wiss över juuch. Wat willt ji denn daun? Wohen willt jp utneihn. Wo willt ji jugen Riekdoom un juge Ehr laten?"

Dat steiht in Jesaja 10,1-3.

Victoria-See in Afrika

Ik will maal erinnern, wat wi an'n Victoria See anricht hebbt. Dor levten rundrüm Fischer, de de in ehren See levenden Fisch, meist verschieden Boorsse, fischten un vun de se leven kunnen.
Denn bröchten Lüüd ut Europa den Nil-Boors na den Viktoria-See. De freet allens up un wöör to een Riesenfisch. Den haalten groot Fischkutter ut de See un Fleiger bröchtern em na uns un de ganze Welt.

Ja, ok bi uns in Stockelsdörp kunnst Victoria-Boors-Filett bi'n Fischmann köpen.

De inheimschen hungrig Jungs an'n Victoria See in Afrika höpen. Een kunn jüm seggen: Håålt man juuch Tucken rut, de See is doot un woll ok all juuch inheimsche Boorsse. Un wat seggen de: Wi hebbt avers Hunger!


Kinner an'n Victoriasee. Bild: Simisa/Wikimedia Commons

Dormit, dat de Veicher ut'n Nil de Fisch ut den Victoria-See wegfreten hebbt, weer dat noch nich naug. Een "wunnerschöön Blaum" sleppten de klauken Minschen vun Europa ut Südamerika in.


Waderhyazinth. Bild: Togo/Wikimedia Commons

De Waderhyazinth wokert un bedeckt wiede Deile vun den See. De See kippt jümmer miehr üm. Allens Leven starvt. De Fisch, de Luft bruukt, kriegt keen miehr. De Planten bruken en anneres Gas, ok dat is weg, Fuulschlamm liggt up'n Grund, un de Gase dorvun, dat Methan un annre, sünd de leegsten Levenskiller.

Een kann sik dat nich vörstellen:

  • Binah 7 Milliarden Minschen leevt up de Ierd.

  • 1 Milliaard hungert.

  • 963 Millionen verhungert elkeen Johr.

 

Hunger un Luxus neveneenanner

Un uns Jungs un Deerns? Stampkartüffel un Suurfleisch bi Mudder? Ne! Villicht en Kartüffelsupp mit en Wüstchen? Ne! Ne!! De mutt dat sien: De Big Mac! De hett 500 kcal. Dat stoppt uns Kinner in sik rinn un ward jümmer dicker un faken leeg, krüüsch sowieso.




Piet Breughel, Schlaraffenland


Keen Handvull Bohnen? Bild: Inge Witzke


Bild: Dr.Lyle Conrad/Wikimedia Commons

Een fehlend Handvull Ries orrer Mais orrer Bohnen orrer Weiten reikte den swatte Deern to't Leven. Sei steiht hungrig up un leggt sik hungrig in en Eck to'n Slaap.
To faken to den ewigen Slaap!

Wo een dat Uns-Vadder-Beden liernen kann

Dat weiten wi, dat dat Hunger in de Welt gifft. Dat vele Kinner veel to frööh starven. De willt ok leven.

Wenn di dat In- un Naföhlen in dat hungernd un nootvull Leven swoor föllt, denn treck man maal mit Maten dörch de bargige Wööst vun'n Sinai orrer een anner, ahn Hotel, ahn Imbissbaud. Denn dankst unsen Vadder in Heven för dat Stück Flådenbroot, dat een Beduin för juuch up de Glaut vun uns sammelt Struukwark ut Mehl un Wader backt hett, denn dankst, dat Ela, uns Sinai-Kunnige een Born weit, wo du di Drinkwader upfüllen kannst.


In gläuhnige Hitt en Lengen na'n Sluck käuhl Wader. Foto R.Witzke

Heit dat in dat Beden doch so:

"Uns Vadder in'n Heven, wi bidd di üm dat Stück Broot hüüt!"

Un schaden deit nich, wenn du seggst:

"Dank ok för den Sluck klores, sauberes, upmünnernd Wader!"


Beed wi för de, de dörch de Nacht up de wille See rettend Land
in veel to lütte, morsche Scheep söken,
Land, wo se leven köönt,
de üm ehr Friesien up de Straat gahn,
för de, de in de Hitt vun de Daag mit een Bünnel Plünnen
unnerwegens sünd, dat Terroristen se nich to faten kriegen,
för de, de mööhsaam na wiede Weeg to'n Sluck Wader kaamt,
de hungert un se nich weiten, wo dat wat to bieten gifft,
för de, de mit hoges Fever vun Fleigen piesackt warden, starven,
wieldat wiet un siet keen Dokter is.
Willn wi beden för all dei, de in Noot un Pien leven
un för de, de mit Gewalt up Minschen losgahn willt:
Gott mucht jüm in den Arm fallen.
Un wi willn beden för de, de up de Sünnensiet
vun dat Leven sünd un undankboor dörch ehr Daag gahn,
dat de mitkriegt, wat jüm allens schenkt is:

Unse Vader in Himmel:
Laat hilligt warrn dienen Namen.
Laat kamen dien Riek.
Laat warrn dienen Willen,
so as in Himmel, so ok op de Eerd.
Uns dääglich Broot giff uns vundaag.
Un vergiff uns unse Schuld,
äs wi de vergeben doot, de an uns schüllig sünd.
Un laat uns nich versöcht warrn.
Maak du uns los un frie vun dat Böse.
Denn dien is dat Riek un de Kraft
un de Herrlichkeit in Ewigkeit.

Amen.

Ut "Op gauden Kurs" vun de Nordelvsche Kark


Flådenbroot för 15 Lüüd un twei Daag! Muscha kratzt de Asch af. Foto Rudi Witzke


6.3.2011


na baven