Dat kannst mi glööven!
Immer wieder gaohn

vun Hubert Looschen


To'n Anhören hier klicken:


Lesen deit Hubert Looschen.


Dat sünd nu all 35 Johr her. Ehr Mann säe bi't Fräustück, hei har nich gaut schlaopen. Sons wör't wie immer. Hei steeg up sien Rad un fäuherde nao dei Arbeit. Hei har nao 'ne ganze Riege Johrn jüss ne neie Upgaobe krägen, dor fraide hei sick äöwer. Unnerwägns füllt hei dote ümme. Mit ein'n Schlag wör siene Frau alleine, fiew Kinner, dei jüngste jüss nägen Johr. Wo schull dat nu wiedergaohn? Jao, väle Traonen häff sei vergaoten.

Nao einige Daoge köm dei Pastor: Nu moss du uphörn tau schraien, nu moss du wiedergaohn. Un sei häff sick uprischket, wägen dei Kinner, wägen ehrn Beruf, wägen aal dei Menschken, dei an ehre Siete stünn'n. Dei Gang inne Karken wüdd immer wichtiger, jeden Dag wör sei morgens vör dei Arbeit inne Misse. Dat häff ehr hulpen, weit sei vandaoge.

Mangers kaomet truurige Menschken nich wieder, sei bliewet staohn bi dei Fraoge: Worüm? Worüm ick? Dei Antwort up disse Fraoge häff dei Witwe sick sülwes gäwen. Alltied kunn sei noch mit den "leiwen" Gott schnacken un tau üm bäen. Dei Kinner, dat erste Enkelkind, dei Beruf, dei Sorge üm dei Familje, ehre Fründe — sei har gor nich recht Tiet, den Kopp hangen tau laoten. Sei häff at Frau ehrn Mann staohn. Väle Fründe stünn'n an ehre Siete, Fründe, dei nich bloß klauk schnackden, dei ehr hülpen. Neie Fründe heff sei fun'n, Fründe bit up den hütigen Dag. Woväle Lüe häbbt woll för ehr bäet? Un alltiet häff sei sick un kunn sei sick an Gott fasteholln.

"Wenn du di up Gott verläss, büss seläwe nich verlaoten", kann sei vandaoge säggen. Dat häff sei sülwes beläwet. Dei Doot is nich dat Ende, dat gaiht immer wieder. Dat häff dei Frau besünners beläwet, at ehr Mann stürw. In dat Dodesjohr harn sei säben Feste mit ehre Kinner fiert: Eine Verlobung, eine Hochtied, Erstkommunion, Affdanzball, einer van ehre Junges wüdd at Schandarm vereidigt, einer möök dat Abitur un dat eerste Enkelkind wüdd geborn.

Dat Läben gaiht immer wieder. Aower du moss't gaohn un nich sitten bliewen. Du moss upstaohn!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


24.3.2019


na baven