Dat kannst mi glööven!
Licht inne Welt bringen

vun Hubert Looschen


To'n Anhören hier klicken:


Lesen deit Hubert Looschen.



Hans Holbein: Maria präsenteert Jesus in'n Tempel (Utsnitt)

Vandaoge fiert dei katholsken Karken dat Fest "Darstellung des Herrn", up plattdütsch Lechtmissen. Siet den ersten Wiehnachtsdag sünd 40 Daoge vörbie. Dei Bibel vertellt, dat Jesus 40 Daoge nao siene Geburt van siene Öllern, Maria un Josef, in'n Tempel brocht wüdd. Jesus wör ja dei Öllste un dei Öllsten hörden immer Gott. Sei mössden utlöset wern. So güngen sei in den Tempel un bröchden Gott ein Opfer — ein paor Duwen. Mehr harn se nich, sei wörn arme Lüe.

40 Daoge nao Wiehnachten het vandaoge bi us: Dei Dannenbööme sünd ut dei Karken rümt, dei Wiehnachtskrippe werd weer inpacket. Un in dei katholsken Karkens werd vandaoge aale dei Kerzen sägnt, wecke van't Johr bruukt werd. Dei Sägn kann us säggen: Nu is Tied d'r van, dat Lecht van Wiehnachten inne Welt tau drägen. Dat is use Upgaobe, use Opfer. Aale käönt dat Licht inne Welt bringen: Junge un Ollde, Lüttke un Groote, Arme un Rieke, Gesunde un Kranke. Use Läwen schall 'n lüttket Lecht wern för annere. Jeder mott daun, wat hei kann. Wi sünd inlaoen, use Läwen für annere tau gäwen. Wecker dat deiht, dei bring Lecht inne Welt, werd för annere tau'n Lecht. So, as dat in eine Geschichte van eine lüttke Kerze vertellt wedd:

Eines Daoges köäm dat Striekholt tau dei Kerze un sä: "Ick schall di ansticken."

Dei Kerze kreeg groote Not. "Stick mi nich an! Wenn du dat dais, sünd miene Daoge tellt. Kiener sütt mehr, wie schön ick bün." Dei Kerze wör schraiensmaote.
"Wullt du dann dien ganzet Läwen kold un hart bliewen? Dann häss du ja gor nich richtig läwet", sä dat Striekholt.

"Aober brennen kellt doch un nimmp mi all dat Moje. Et kosset mi dat Läwen."
"Dat is wohr", versöchde dat Striekholt tau trösten. "Aober wi mäöt doch Lecht inneWelt bringen. Wenn ick di nich ansticke, häff mien Läwen uck kienen Sinn. Wenn du nich brenns un lüchtes, häss ümsüss läwet. Du schass doch Lecht inne Welt bringen. Aals, wat du giffs, is wichtig, werd tau 'n Lecht för annere. Annere werd dien Lecht wiedergäwen, wenn du utbrennt büss."

Dat seeg dei lüttke Kerze woll in un sä tau dat Striekholt: "Stick mi an!" So häbbt beide ehr Läwen woll weggäwen, aober daon, wat ehr taudacht wör.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


3.2.2019


na baven