Dat kannst mi glööven!
Wenn't gaut wern schall

vun Hubert Looschen


To'n Anhören hier klicken:


Lesen deit Hubert Looschen.


Har ji dat uck all maol hört? Dor vertellt twei Lüe van deisüfftige Fier, van einen Beseuk in dat süfftige Lokaol. Ruut kaomt aower twei ganz verscheiden Vertellsel. Dei eine praohlt aal man tau, man tau. Dat häff üm heil gaut gefallen. Hei häff sick dor besünners gaut feult. Dor will hei noch maol wedder hen. Dei annere möck bi't Vertelln all 'n suur Gesicht. Du kanns all seihn: Dat häff üm nich gefalln. Nix wör up Stäe, aals is scheiw lopen. Hei bruckt dor nich wedder hen.

Eine Fier, ein Beseuk — twei ganz annere Geschichten. Wor kann 't an liggen?

Vör dat Tor van eine Stadt seet Dag in, Dag ut 'n öllern Mann. Jeder, dei inne Stadt wull, mösde an üm vörbi. Eines Daoges köm ein Kerl un frög: "Sägg maol, wo sünd dei Lüe in disse Stadt? Kann man d'r mit ümmegaohn?"

Dei olde Mann frög trügge: "Wor büss du taulessde wäsen? Wo wörn dei Lüe dor?"
"Dat wörn wunnerbore Lüe", köm dei Mann in't Praohlen. Dei Lüe harn üm heil gaut gefallen. Fröndlick, sei harn üm hulpen, üm in ehre Hüüser inlaorn un wörn richtig gaut tau üm wäsen.
Dei olde Maan sä: "So sünd dei Lüe hier uck!"

Paor Daoge läöter köm'm annern Gast, hei har deisüfftige Fraoge. "Hör eis, olde Mann, wo sünd dei Lüe in disse Stadt?"
Un wedder fröög dei olle Mann trügge. "Wo wörn dei Lüe in dei Stadt, dei du taulessde besöcht häss?"
"Dat wörn schreckliche Lüe", schüllt dei Mann. Gemein wörn sei wäsen, kiener har üm hulpen, immer gneisig un leipe Luhne. Die Lüe wörn üm immer ut'n Weg gaohn.
"Ick bün bange, hier sünd dei Lüe jüss so", verklaorde dei olde Mann den Gast.

Leiwe Tauhörinnen un Tauhörer! Ein Spräkwort sögg: "So as du in'n Wald rinröpps, so kummp't uck wedder trügge". Gaue Luune, Fründlickkeit, tau annere gaut wäsen, dat kummp uck so trügge. Dat ligg woll an mi sülwes, wo Lüe mit mi ümmegaoht.

Wenn't an mi sülwes ligg, dann will ick fort d'r mit anfangen, dat disse Dag ein' gauen Dag werd.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


9.12.2018


na baven