Dat kannst mi glööven!
Kien Billigfleisch inne Fassentied!

vun Peter Kossen


To'n Anhören hier klicken:
Lesen deit Peter Kossen.


Karneval wett d' fiert vandaoge un morgen noch, in 't Rheinland, aower uck in Norddütschland an väle Stäen. Läbensfraide vebinnt Frönde un Frömde. Alle Mensken sünd in 'n Karneval gliek: so is dat van oolsher. Grote un lütke Lüe vekleed't un maskeert sick. "Eigentlich bün ick ganz änners; ick kaom man nich faoken dortau!" In 'n Karneval vellicht doch! —

Un Middewäken is 't aal vöbie. Aschermiddewäken fang dei Fassentied an. "Carne levare" — dat is Letiensch un bedüet: "Dat Fleisch wet wegnaohmen." Dat Wort "Karneval" mennt dei Daoge, bevör dei Fassentied anfang un dat Fleisch wegnaohmen wett. Use Vörfaohren hebbt dat so maokt, un manges einen holt d' vandaoge noch an fasse: Kien Fleisch inne Fassentied.

Leiwe Tauhörers, ick schlao vör: "Kien Billigfleisch inne Fassentied!" Ick menn dormit dat Kilo Hackfleisch för 2,77 €, dat Häuhnerbein för 17 cent/100g un dei Braotwuss för 89 cent. Säben Wäken gaut henkieken, wor dat Fleisch herkump. Säben Wäken naohfraogen: Up wecke Wäge kump dat Fleisch inne Käuhltheke? Sünd Deierten un Mensken up disse Wäge gaut behannelt of quält worn? Is dei Buur anstännig betaolt worn för siene Arbeit un uck dei Arbeiter inne Schlächterei? Dat heruttaufinnen, is nich ganz einfach, aower vellicht 'n Vörsatz för dei Fassentied: Bit Ostern ät ick bloß Fleisch, wat Mensken, Deierten un Natur nich vedarwt; Fleisch, dat wat wert is un nich veschüürt wett för 'n Appel un 'n Ei. Dei Maihde maok ick mi un fraog mi dat naoh: Wor kump dat Schwienfleisch, Rindfleisch, of Häuhner- of Putenfleisch her?

Läbensfraide — dorüm gaiht et uck inne Fassentied: Wat bruk ick wücklich tau 'n gauet Läben? Wat is wichtig för mi? Wor bün ick unfrei? Wor läw ick up Kosten vanne Gesundheit, up Kosten van ännere Mensken? Woför nähm ick mi Tied? "Kien Billigfleisch inne Fassentied!" För dei meisten Lüe is et gesund, maol 'n Tied up Fleisch tau vezichten, man nich för aale. Bi 't Inkoopen 'n Ogenblick länger naohdenken! Brand in Lohne un Schulte in Lastrup — dei maokt dat bäter mit dei Deierten un mit dei Mensken. Un dat giff landup, landaff wisse noch mehr van sücke Schlächters.

Fassentied, dat is dei Fraoge: Wat kann ick ännern in mien Läben, dormit ick mehr Läbensfraide hebb, ick sülwes un miene Mitmensken uck? Wisse, dat is man bloß 'nen lüttken Anfang för jau un för mi: Kien Billigfleisch inne Fassentied!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


26.5.2019


na baven