Dat kannst mi glööven!
För 'n gerechten Freer aals insetten — uck den Freer!

vun Peter Kossen


To'n Anhören hier klicken:


Lesen deit Peter Kossen.


"Läwst du gern?" — Vör Jaohrn frög mi einer: "Läwst du gern? Büss du taufreer mit dien Läben, fraist du di, dat du dor büss?"

Leiwe Tauhörers, Freer säuken fang bi mi an. Faoken hett Unfreer üm mi herüm dormit tau daun, dat ick untaufreer bin. "Säuk Freer" — dat bedüet: Freer mit di sülwes, mit dat Lechte un dat Düstere in dien Läben. Man dat heit nich: "Du moss utholen, wat d' nich uttauholen is. Schwieg stille! Duk di! Fall nich up!" — Dat is kien Wäg taun Freer. Gägen Ungerechtigkeit mott man upstaohn.

För 'n gerechten Freer mot 'm aals insetten — uck den Freer! Vandaoge is dei 74. Jaohresdag van dat Attentat up Adolf Hitler an 'n 20. Juli 1944. Claus Schenk Graf Stauffenberg un 'n Reege ännere wörn paraot, Adolf Hitler doot tau maoken un dat Stüer rümtaurieten in ein Land, dat up 'n Wäg wör in 'n Affgrund.


Elisabeth un Nikolaus Groß. Foto Archiv Bistum Essen/Wikimedia Commons

Einen, dei wat wüss, wör Nikolaus Groß, Gewerkschafter un Journalist in 't Ruhrgebiet. At Katholik, Arbeiter un Familienvaoder kennde Groß dei Arbeitswelt un dei Not van d' Arbeitslüe. Hei warkde un schreew för Gerechtigkeit un Solidarität, wull Stimme wään för dei, wecke kiene Stimme haarn. "Man mott up Gott mehr pareren at up d' Mensken." Dat bedüerde för Nikolaus Groß, mit sücke tauhopetaudaun, wecke sick Gedanken möken äöwer ein Dütschland naoh Adolf Hitler. Anspraoken up dei Gefaohr, dormit uptaufleigen, säe Nikolaus Groß: "Sett wi vandaoge nich us Läben in, wi willt wi dann einmaol vör Gott un vör us Volk bestaohn?"

Dat Attentat van 'n 20. Juli is misse gaohn; uck Nikolaus Groß wütt fastenaohm un van 'n Volksgerichtshof ünner Roland Freisler an 'n 15. Januar 1945 taun Dood veurdeild. An 21. Januar schriff hei an siene Familie: "Woväl haar ick noch för jau daun wullt — dei Herrgott hett et änners fügt… Sien Willn schall an us passeiern." Noch einmaol sütt Nikolaus Groß siene Ehefrau Elisabeth: "Säukt naoher nich mien Lichnaom. Sei willt us all vebrennen. Un doch will dei Herrgott us uperstaohn laoten. Wi seiht us woller in eine bätere Welt." —

För den Freer hett Nikolaus Groß aals insett un sien Läben velorn. Elisabeth blew mit säben Kinner trügge. För Gott, för dei Leiwde hett uck sei aals insett: den Freer un ehr Läbensglück. Dat neie Dütschland is upbaut up sücke Mensken, up ehr Beern un Opfern. Jesus segg: "Wenn dat Weitenkörn nich in d' Eern fallt un starwt, bliff et allennig; wenn et aower starwt, bring et rieke Frucht…" — "Säuk Freer" up dissen Wäg!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


18.11.2018


na baven