Dat kannst mi glööven!
Dien Brauer was dot — un nu läwt hei weer!

vun Peter Kossen


To'n Anhören hier klicken:


Lesen deit Peter Kossen.


"Dat is nich richtig! Du most d' ganz änners mit. So wett dat nicks mit di!" — Leiwe Tauhörers, Mensken veännern, dat kannst vegäten! Veännern kann m' bloß sick sülwes, nich dei Lüe. Man, wektien veännert sick wat inne Welt. Mensken ännert dann doch mit 'nmaol ehr Läben.

Einer vetellt, wo dat taugaohn is mit üm; hei segg:
Jaohrelang was ick 'n Queeskopp, ick was bange, luunschk un düchdig naoh mi tau. Un jederein sä mi immer weer tau, ick möss mi ännern. Un jederein säe mi immer weer tau, wo gräsig ick was. Dat kült mi un doch kunn ick d' nich gägen an — ick wüss: Sei harn recht! Un ick wull mi ännern, man ick wütt d' nich mit, so gau ick dat uck vesöchde.
Wat mi an meisten kült, was, dat min besten Frönd mi uck immer weer tausä, wo gräsig un luunschk ick was. Ick möss mi ännern, dat sä uck mien Frönd.


"Du musst...!"

Ick wüss mi gaor kien Utwäg mehr.
Eines Daoges sä mien Frönd dann: "Änner di nich! Bliew so, at du büss! Dat is wücklich nich wichtig, off du di änners off nich. Ick mach di lien, so at du büss. So is dat nu maol."
Disse Wöör klüngen at Musik in miene Ohrn: Änner di nich, änner di nich… ick mach di lien. Un ick wütt still, un ick wütt lebennig, un Wunner äöwer Wunner: Ick ännerde mi! —
Nu weit ick, dat ick mi nich wücklich ännern kunn, bit ick einen funnen haar, wecke mi lien möch, off ick mi nu ännern wull off nich.

Leiwe Tauhörers, allein Fröndschup un Leiwde maokt Mensken frei. Jesus winnt up disse Wiese den Zöllner Zachäus un väle ännere. Dei, wecke dat nich tügen köänt, segg Jesus tau: "Dien Brauer was doot un nu läwt hei weer! Hei was veloren, un nu hebbt wi em weerfunnen!" Jesus vetellt dei Geschicht van den Söähn, wecke missegaiht un eines Daoges doch weer trügge findt naoh Huus. Sien Vaoder staiht vör d' Dörn un haolt üm weer in 't Huus herin, einfach so. Jesus maokt Mensken Maut: Gott teuwt lange un siene Leiwde winnt äöwer aals, uck äöwern Queeskopp!


De verlaren Söhn, St. Aegidien, Lübeck



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


3.9.2017


na baven