Passion 2024
Invocavit

vun Marlou Lessing

De Weg geiht los. De Weg vun de Passion. As en Piel wiest de Toorn strack na'n Heven.

Na'n Heven, dor schall de Weg henföhrn. Un dor geiht he ja ok hen. Wi weet dat. Denkt wi. — Wenn'n weet, dat allens good utgeiht, denn is de ganze Weg ja licht, nich?

Man wat is, wenn dat nich wiss is? Weer dat denn wiss för Jesus? Weer de Kampf eentlich al lang wunnen, de Sieg wiss, un he müss sik bloots noch över de Runnen retten? Orr stünn för em allens op de Kipp? Un dormit — för uns?

'keen Sünn deit, de is vun'n Düvel; denn de Düvel hett vun Anfang an Sünn daan. Gotts Söhn is kamen, dat he den Düvel sien Wark toschannmaakt.

1. Joh. 3, Vers 15
Wekensprook för de Week na Invocavit 2024

Dat weer Jesu Kampf. "Maakt kaputt, wat juuch kaputtmaakt!", seggt Minschen. Man Jesus wull nich tweimaken, wat em sülven verdwars keem. Jesu Kampf weer: He wull tweimaken, wat uns tweimaakt. Un dat is den Düvel sien Wark.

Wat vun'n Düvel is, lett uns keen Roh nich, treckt uns jümmers wedder an. Gier, Sülvstgerechtigkeit, Gewalt. Wi wüllt villicht wedderstahn, man wi verleert den Kampf, un denn sünd wi doch wedder in't ole Gleis. Wi Minschen sünd meist mehr op den Düvel sien Siet as op Gotts Siet.

Un denn maakt de Düvel uns sülvst toschannen. Denn verleert wi eerst so richtig. Denn de Düvel maakt all to Verlerers.

Nich Jesus. Jesus hett sienen Kampf wunnen, ok wenn wi unsen dagdääglich noch verleert. He winnt för uns un maakt ok uns to Winners.

Weer dat wiss? Vun Anfang an? — Mag ween. Mag ween, dat Gotts Gööd so groot weer. Dat wi uns dorto verlaten kunnen, he wöör uns vör uns verdüvelte Natuur retten.

Man sülvstverständlich is dat nich.