De Lübecker Bibel

De een orrer de anner mag sik noch besinnen up dat Book orrer den Film "Der Name der Rose". De Geschicht speelt in en Kloster; gräsig Saken hebbt sik todragen. Aver dor weer ok to sehen orrer to lesen, wat Mönke den Dag över to doon harrn. Se hebbt - as Bispill - Böker afschreven, mit de Hand. Dat hett vele Maand duurt, un denn harrn se graad een Book trecht.

So'n Böker - Handschriften - weern kostbar un düür, bet Gutenberg dat Drucken, de Druckerkunst erfunnen hett.

Al vör Martin Luther geev dat ene ganze Reeg vun Bibeln, de weern druckt.

In Lübeck hett Steffen Arndes leevt, en Drucker, de 1494 en Bibel, de "Lübecker Bibel", druckt hett. De Text weer nedderdüütsch: Dorto sünd 152 Holtsnitte in dat Book, wunnerschöne Holtsnitte. Dat Book hett 492 Bläder.

Wokeen de schönen Biller sneden hett, is nich kloor Dat süht so ut, as weern dor twee Meister an't Wark west.
Vun den eersten sünd de 49 Biller, de Moses sien Geschichten vertellt. Disse "Darstellungen" sünd ganz fein utarbeidt. En Boom, de hett Äst un Telgen, bi'n Peerd kann een de Hoor tellen
De Biller vun den annern sünd en beten slichter, man dor sünd en poormal de Kirchtorms vun Lübeck to sehen! Un as de Königin vun Saba Salomo besöken deit, dor is dat in en Stadt mit Treppengiebel.

De Biller weern swatt/witt, nich bunt anleggt. De Künstler hebbt dat mit Schraffuren un mit de Perspektive so lebennig henkregen, Farv harr dor stöört.

De Minschen seht ut, as weern se hier to Huus. De Mannslüüd groot un graad, de Fruun fein antokieken, antrocken, as dat to de Tiet de Mood weer.

Vun disse "Lübecker Bibel" gifft dat noch en poor, een hier in Lübeck, een in Hamborg un annerswo ok noch.

Un wenn een sik de Biller ankieken deit, dann warrt een niegierig. De Biller lockt. De lockt, mal wedder in de Bibel to lesen, de Geschichten vun Jonas, vun Adam un Eva, vun Kain un Abel orrer vun Absalom.

Karl-Heinz Nissen

De 92 Holtsnitte in de Lübecker Bibel vun 1494 sünd - liek dat Bild vun Meister Bertram "Gott maakt de Deerten" - för ehr Tiet wat heel Modeernes west. De Künstler is nich bekannt.
De gotsche Maalwies harr ehr Egenoort, de Landschaft speelte keen groot Rull, de Gesichter harrn faken so wat vun een Mask. Afhoven as ut een anner Welt warrn uns de Minschen wiest.

Ganz anners de Biller in de Lübecker Bibel: De Holtsnieder snitt kraftvull Keerls mit breide Bost in't Holt. De Gesichter sünd de vun verwegen, eernsthaftige Minschen. Swoor is ehr Gang. De Fruuns gifft he een leevlich Utseihn vull Anmoot. De Landschaft speelt mit. Se kriggt een Bedüden för dat, wat de Holtsnieder mit dat Bild seggn will. So bringt de Künstler uns Bekiekers de Geschichten wat neger in uns Leven.

Rudi Witzke