Martin

Andacht vun Brigitte Fokuhl

Siet poor Daag is Martin bi uns. He is 'n däägten Keerl, villich 'n beten groff, aver wenn't nödig deit, seggt he de Wohrheit un lött sik nich rinreden. Eten un Drinken, dat smeckt em. He langt düchdig to un höllt sik nahst den Buuk. Is woll doch 'n beten veel worrn. He mütt nu bannig upstöten un af un to ok mal pupsen. Tschä, binnen in't Lief is bi em allens in de Reeg.

Wenn wi mit em an'n Disch sitten, denn fraagt he uns ofteens mal, worüm wi denn nich pupsen un upstöten. Odder hett uns dat Eten etwa nich smeckt? Doch, doch, dat woll, aver wi ünnerdrückt sowat, bit wi mit uns alleen sünd. Up'n eersten Blick is dat nich unbedingt to sehn, dat he so'n düchdigen Keerl is. Siene Visaasch hett Ecken un Kanten. Aver dat Leven hett em tosett. Denn kümmt sowat dorbi rut.

Op en Websöök kannst den Playmobil-Luther to Dutzen finnen!

Wenn he rackerig warrt, nagelt he ok mal "Flyers" an de Karkendör un schimpt över de Lüüd, de meent, se köönt sik mit veel Geld vun ehre Sünnen frieköpen. Sowat klappt aver nich. Un wenn de Böbelsten Martin to Lief wüllt, denn stellt he sik breetbenig hen un röppt luut: "Hier stah ik, ik kann nich anners!"

Wenn wi man all so veel Kraasch harrn as Martin, denn wäär de Welt woll nich mit so veel Düvels besett.

Dat gifft ok Albrecht Dürer vun Playmobil, afbildt bi dat Malen vun — Albrecht Dürer. He kost mehr as Luther un is also wirklich dürer!

Also, Martin heet mit Tonaam Luther un is vun "playmobil". Un he steiht bi uns up'n CD-Regaal. Swatt Kledaaschen hett he an un 'n swatten Hoot up, mit Fedderkiel in de rechte un de Översetten vun't Olle un Niege Testament in de linke Hand. "En faste Borg is unse Gott, en gode Wehr un Waffen!" Dat is doch wat!

Amen.