Wees fief Minuten still
4. Juni


Andacht vun Heinrich Giesen, in Platt bröcht vun Anke Nissen

De Hillig Geist warrt mi verklären.

Johannes 16, 14

Dit sä Jesus vun sik sülven. De Hillig Geist maakt also wat klor, ganz klor. Een kann vun Jesus blots klore Utsagen maken, wenn de Hillig Geist al hannelt hett. Uns Utsagen över Jesus sünd nich jümmers klor. Dat gifft Ogenblicke in uns Leven un Situationen, in de wi uns vun em afwennen wüllt.

Denn seggt wi — un dorbi treckt wi de Schullern hooch — so hett Christus dat bestimmt nich meent.
Denn treckt wi uns Menen sien Menen vör.
Denn hollen wi Jesus för enen, de in 't Swögen un Swärmen kamen is, un wi meent, dat wi dorgegen ganz klor denken doot.

Man wokeen Jesus för enen Swärmer hollen deit un meent, dat he em nich folgen mütt, de irrt sik. Un dat gifft bi so 'n Irren blots een Help. De Hillig Geist mütt uns den düüstern un verworren Blick nehmen un uns Christus wedder klor vör Ogen stellen. Denn köönt wi ok wedder to em seggen: "Nich wi, nee, du hest recht!"

Wi laat uns schaukeln as Motten vun 'n Wind. Wi sullen aver seker na dat Ziel hen flegen. De Hillig Geist kann dat schaffen, dat wi nich swärmen, sondern dat wi upföhrt mit Flünken as so 'n Adler.

O kumm, du Geist vull Wohrheit,
un kehr nu bi uns in,
breet ut dien Licht un Klorheit,
driev Lögen ut un Schien.

Philipp Spitta
Plattdüütsch: Gerd Koll un Heinrich Schmidt-Barrien


31.5.2009


na baven